Monday, December 7, 2009

البؤجة الشتوية



ميعادنا ان شاء الله

يوم الجمعة 11 ديسمبر

الساعة 11 صباحا


مكان اللقاء هو مسجد زهراء مصر القديمة فى الزهراء
و بعد كده هنتحرك للمقر الجديدة للجمعية و هو قريب جدا من المسجد

دى خريطة لمحطة مترو الانفاق اللى اسمها الزهراء و لونها بالازرق اما اللون الاحمر فهو لمكان المسجد
و ده سهل اوى للناس اللى هتستخدم المترو



فى حالة ان حد تاه ممكن يتصل على الارقام دى

الاستاذ خالد صاحب مدونة همس الاحباب
0101345140



و فكرة البؤجة هى - للى مش شارك قبل كده - انك و انت بتبدل الملابس الصيفى بالملابس الشتوى تشوف ايه اللى انت مش محتاجه منها يكون ضاق عليك او خلاص زهقت منه او موضته خلاص فات اوانها و تجمع الحاجات دى مع اى حاجة تكون مش عايزها فى بيتك ملايات - فوط - احذية - ادوات منزلية - اى حاجة انت مستغنى عنها و نروح كلنا لعشوائيات اسطبل عنتر و نديها للناس هناك فى جمعية صحبة خير و هم بيخدوها و بيعملوا بها معرض للاسر الفقيرة و تتباع لهم الحاجات باسعار رمزية و المبلغ اللى يتجمع من المعرض بتستغله الجمعية فى عمل خيرى تانى و ده علشان الناس اللى هتتباع لهم الحاجة تحس انها دفعت فيها و انها مش شحانة


افتكروا و انتم بتقروا البوست ده ان البرد مش بيرحم حد و ممكن يكون سبب فى وفاة طفل صغير مش لاقى غطا كفاية له
فى الوقت اللى عندنا فيه حاجات كتير اوى مش بنحتاجها و بتقول لنفسنا خاليها مركونة يمكن نحتاج لها
صدقونى اللى بيتبرع بحاجة ربنا بيعوضه عنها بحاجات اكتر
و التبرع ممكن يكون بأى شىء عينى او مادى

ياريت كل مدون يقدر ينزل بوست عن الموضوع يبقى جزاه الله خير علشان نبلغ اكبر عدد ممكن



Sunday, August 23, 2009

فطار الخير

كل عام و انتم بخير

و رمضان كريم

و يارب يتقبل صيامنا و صلاتنا و قيامنا فيه


السنة اللى فاتت ربنا وفقنا و عملنا يوم جميل التقينا فيه على الخير و اسعدنا اطفال كتير معنا فى مستشفى ابو الريش

و يمكن يومها شوفنا ان اغلب الاطفال سنهم صغير و بيحتاج وجود مرافق معهم و
غالبا بيكون المرافق ده ام الطفل او باباه .. الناس دى لاحظنا انهم وقت الفطار
بيدور على اى حاجة بسيطة تنفع يفطروا بها لدرجة ان فى امهات فرحت بشوية
البسكويت اللى وزعناهم للاطفال علشان تخليها للفطار


طفل مريض و بيتالم حاجة صعبة جدا .. لكن فى نفس الوقت المرافق له بتكون حالته اصعب لانه مش
عارف يخفف عنه ازاى .. و علشان كده الفكرة المرة دى هتكون للناس دى .. محاولة للتخفيف عنهم و نقولهم اننا بنشارككم حتى لو بوجبة افطار بسيطة


و طبعا اللى يحب منا يقدم تبرع مادى او عينى بجانب الوجبة يبقى جزاه الله خيرا


الوجبة هتكون عبارة عن : رز + خضار + قطعة فراخ او لحمة + مخلل
عيش + ثمرة فاكهة

و هيكون تكلفيتها 10 جنيه
و المعاد هيكون يوم 5 سبتمبر

الساعة 3 قدام باب مستشفى ابو الريش اليابانى للاطفال

نفس المستشفى اللى اتجمعنا فيها قبل كده


و لو ربنا اكرمنا و كان عدد الوجبات يفرح و عددها كتير ممكن نفطر التمرجية
بتوع المستشفى او نطلع على المستشفى اللى جنبها و هى مستشفى المنيرة لاطفال و
نوزع على المرافقين هناك


و اليوم ده مش بس للناس ده كمان لنا احنا لان الرسول الكريم قال " مَن فطَّر
صائماً كان له مثل أجره غير أنه لا ينقص من أجر الصائم شيء "يعنى ان شاء الله ناخد اجر صيام كل شخص قدمنا له وجبة


و فى حاجة عايزة اقولها للناس اللى مش هتقدر تشارك فى التبرع انهم ممكن
يحضروا معنا و يشاركوا فى توزيع الوجبات و التخفيف عن الاطفال و اكيد ده
بردو له اجر عند الله


و طبعا لاننا مش هنلحق نرجع بيوتنا على وقت الفطار ممكن بعدها نروح نفطر مع
بعض فى نفس المكان اللى روحناه المرة اللى فاتت - جزا الله سوو خيرا هو اللى راح
صور المكان و جاب قائمة الاسعار منه - محل ابو خالد فى شارع شمبيليون و
ده بيقدم مشويات و رز و سلطات و سعر الفطار عنده ممكن يكون فى حدود ال 30 جنيه

و لو حد عنده اقتراح بمكان تانى للفطار ياريت يقول لو المكان ده مش مناسب
وممكن لو تحبوا نعمل حسابنا اننا نفطر من نفس الوجبات اللى هنقدمها للناس معهم


اما بقى عن الوجبات اللى هنقدمها للناس فيفضل كل حد ناوى يشارك معنا يبعت يقولنا على الايميل او برسالة على الموبايل بالعدد اللى ناوى يشارك به علشان احجزه

المرة دى مينفعش نحدد يومها لازم على الاقل يوم الاربع اكون عارفة عدد الوجبات اللى هحجزها علشان تتحضر ليوم السبت


ده ايميلات الناس المسئولة عن اليوم





و ده ارقام ممكن تبعتوا رسالة عليها او تسالوا على اى شىء خاص باليوم ده


استاذ خالد صاحب مدونة همس الاحباب

0101345140




اللهم ارزقنى و اياكم فى هذا الشهر رحمة الايتام و إطعام الطعام و إفشاء السلام و
صحبة الكرام يا ارحم الراحمين

Monday, April 13, 2009

بؤجة جديدة


اولا

ميعادنا اول مايو ان شاء الله للبؤجة

الجمعة 1 مايو



و فكرة البؤجة هى - للى مش شارك قبل كده - انك و انت بتبدل الملابس الشتوى بالملابس الصيفى تشوف ايه اللى انت مش محتاجه منها يكون ضاق عليك او خلاص زهقت منه او موضته خلاص فات اوانها و تجمع الحاجات دى مع اى حاجة تكون مش عايزها فى بيتك ملايات - فوط - احذية - ادوات منزلية - اى حاجة انت مستغنى عنها و نروح كلنا لعشوائيات اسطبل عنتر و نديها للناس هناك فى جمعية صحبة خيرو هم بيخدوها و بيعملوا بها معرض للاسرة الفقيرة و تتباع لهم الحاجات باسعار رمزية و المبلغ اللى يتجمع من المعرض بتستغله الجمعية فى عمل خيرى تانى و ده علشان الناس اللى هتتباع لهم الحاجة تحس انها دفعت فيها و انها مش شحانة و بعد التبرع ان شاء الله هنتجه للازهر بارك و تكون فرصة للترحيب بمهندس مصرى لوصوله لمصر .. بس اللى عنده اقتراح بمكان تانى غير الازهر بارك يقول


تانى حاجة
فى كل لقاء للتبرع بنتجمع بعد اللقاء فى اى مكان علشان نتعرف على بعض اكتر لكن انا لاحظت ان اغلب الحوارات اللى بتكون قايمة فى اللقاء ده حوارت كلها شخصية ..جميل طبعا اننا نحاول نقرب من بعض لكن فى نفس الوقت مفروض مننساش فى اللى كان السبب فى تعارفنا فى الجانب الفكرى .. يعنى ليه بعد التبرع ميكونش لقاءنا زى حفلات السمر و لها جدول كمان يعنى اللى بيحب الشعر يشارك معنا و اللى يحب يناقشنا فى قضية معينة او موقف معين يطرحه و اللى عنده موهبة فنية يعرفنا عليها ..كأننا بالظبط بندخل مدونة و نقول تعليقنا عليها ..كده هندى فرصة للى عنده موهبة ما يعرضها و هيكون اللقاء له هدف اكبر


تالت حاجة

المشاركات فى التجمع لاحظيت انها بتقل ..يمكن هناك اسباب كتير و كل واحد عنده اسبابه .. بس السبب دى اكيد مش دائم ..يعنى السبب اللى مخلاش حد يشارك المرة دى مش شرط انه يكون موجود المرة اللى بعدها .. بس يمكن الناس بتكون مش عارفة امتى التجمع التانى علشان كده فكرنا اننا نخلى التجمع يكون اول جمعة من كل شهر ..هنرتب و نعمل جدول سنوى بالنشاط اللى هيقام فى اليوم ده . علشان كل واحد يكون عارف قبلها بفترة كافة و يختار كمان اليوم المناسب له ..و كمان اللى مش قادر يشارك فى التبرع يقدر يشارك فى التجمع اللى بعد التبرع


رابع حاجة

ياريت اللى عنده افكار لاعمال خيرية او اماكن هو شايف انها تستحق المساعدة او حتى اسر معينة ياريت يقولنا .. وبردو اللى يحب يشارك معنا فى القاعدة اللى بعد التبرع بموهبة عنده او موضوع ياريت يبلغنا و ممكن تكون لقاء مخصوص لعرض افكاره ... بس و النبى بلاش السياسة و الجدال فى الدين


اخيرا
اللى عنده استعداد يعمل تجمع خيرى يقولنا و احنا ان شاء الله هنشارك معاه .. لان الهدف هو نشر الخير فى كل المدونات من كل المدن . .و خير مثلا على ده مدونة نهر الحب اللى نقلت فكرة الخير لمدينتها جزاها الله كل خير

Monday, April 6, 2009

زيارة الى جمعية التثقيف الفكرى ببورسعيد

تحديث
التبرعات ستقسم ان شاء الله
على جمعية التثقيف الفكرى ببورسعيد والجمعية ببورفؤاد
لقاء بورسعيد الثالث ان شاء الله

سيكون ان شاء الله تعالى يوم الجمعه 10/4
للقاء المعاقين الايتام
هنتقابل الساعه 11ظ فى جمعية التثقيف الفكرى

ببورسعيد

وهى جمعية اهلية غير مهتم بها
بها العديد من الاطفال اللى بجد محتاجين مساعدتكم

معاقين وقست عليها الحياة بأن اصبحوا ايتام
الجمعية بها اكثر من 100 حالة اعاقة فى الاغلب ذهنية
مقيم بها حوالى 40 حالة بصفة مستمرة
منهم اكثر من 15 حالة مرضية
انا شفت المكان والناس دى فعلا محتاجة المساعدة وتستحقها
لان حالتهم بجد صعبة جدا ومساكين لاقصى درجة
وللاسف لو خرجوا للشارع بيتم استغلالهم بأبشع الطرق
الحالات اللى هنقابلها ان شاء الله
فيهم 23 فتاة من سن 8 سنوات الى سن 45 سنه
ومنهم 17 شاب من سن 11 سنة الى سن 26 سنه
لكم انن تتخيلوا هذا العدد من المعاقين ما بين اعاقة كاملة واعاقة بسيطة
ومدى احتياجهم للمساعدة ومدى احتياجهم لكل شئ يعينهم على الحياة
فى منهم حالات مرضيية بجانب الاعاقة
زى اسلام 11 عام لايتحكم بنفسة ويحتاج بامبرز مقاس (L)
وزى اسراء 22 سنة التى تعانى حالة مرضية
وزى على سويلم لا يستطيع الحركة الا على كرسى متحرك ولا الرؤية
بجد ناس محتاجة كل حاجة مننا واى حاجة



لانهم ليهم حق علينا

اللى يقدر بجد على حاجة يساعدهم بيها


حتى الملابس المستعملة او الاحذية


او فوط

كور الجلة 2/4/3كجم لان بهم رياضيين


كاسيت او ديفيدى للتعلم عليه او الترفيه


و كور للعب
ميكروفون لاسلكى

تربيزة تنس طاولة

بازل
كتب تلوين
الوان
العاب تكوين
او مكعبات
العاب ذكاء
راكت
مظلة
صلصال
حلوى
عصاير
اللى تقدروا عليه
مقاسات الناس

2 S بنتين

8 M نصفهم ولاد

12 L منهم 8 بنات

7 XL منهم اربعة فتايات

11 XXL منهم 6 شباب
*&*&*&*&*&*&*&*
بعد اللقاء ان شاء الله هنتغدى سوا فى مكان ان شاء الله يعجبكم


ونتكلم ويكون لقاء تدوينى جميل
رقم التلفون للى هيجى
0188047779
لو سمحتموا بس اللى هيجى يقولى عشان اقدر احجز
باقى اليوم على العدد
يارب نتجمع ونبقى كتير
ونحاول نعمل خير


البوست ده من مدونه ايناس نهر الحب اللى هيجيى يبلغها يا ريت انا رايحه اللى عاوز برضه يبعت معايا حاجه ومش هيقدر يجى معنديش مشكله

Wednesday, March 25, 2009

ميعاد المكتبه والكتب

زمان فى المدرسة كان من اهم النشاطات اللى بحبها ان مدرسة الفصل تقول هنعمل مكتبة فى الفصل صغيرة و نشارك فيها بكتب و نتبادل الكتب والقصص مع بعض و كان من حقى استعير الكتاب لمدة اقصها اسبوع و ده كان بيشجعنا اننا كل اسبوع ناخد كتاب جديد


و لانى حاليا معنديش وقت للقراءة بالرغم من وجود كتب جديدة نفسى اقرها ..اكتشفت ان فعلا اكتر وقت كان الواحد بيقرا فيه هو من سن 9 سنين لحد دخول الجامعة


و من هنا جات لى فكرة الخير اللى جاى

ان فى اطفال فى السن ده ممكن لو اتوفر لهم الكتاب يقدروا من خلال القراءة يصقلوا شخصيتهم و يوسعوا خيالهم و ينموا موهبتهم .. لكن مش كل الاطفال بيتوفر لهم الكتاب و ده لان تمن الكتاب لهم ممكن يكون تمن وجبة او تمن دوا




علشان كده .. المرة دى هيكون تجمعنا ثقافى ...ازاى ... يعنى كل واحد عنده كتاب قراه و مركون على الرف او قصة جميلة يحب يوسع بها خيال غيره او حتى مجلات اطفال تضيف بسمة على وشهم .. يحضرهم علشان يشارك بهم معنا فى يوم المكتبة ..


اليوم ده هنروح لمكان فيه اطفال ايتام او مكان بيوفر محو الامية لاطفال الشوارع .. و نعمل رفوف مكتبة و نحط عليها الكتب و المجلات و نكون حريصين ان المكان ده يكون متواجد فيه الشخص المناسب انه يكون امين المكتبة علشان يقدر يحافظ عليها



اختيارى للمكتبة لسببين

الاول حديث الصدقة الجارية ..علم ينتفع به

التانى اننا نشارك فى مساعدة الاطفال على تنمية شخصيتهم و متكونش مساعدتنا لهم بس مادية

يمكن فعلا هم محتاجين المساعدة المادية و العينية علشان يتوفر لهم عيشة ادمية .. لكن فى نفس الوقت هم محتاجين يندمجوا مع المجتمع اللى حواليهم و يتعرفوا على ثقافات تانية و يتعلموا ازاى يشاركوا فيها و ده مش هيحصل غير طريق حاجتين القراءة او الاحتكاك الفعلى من خلال شغل او دراسة .. و اعتقد ان القراءة هتمهد الطريق لبر الاندماج ده









ميعادنا بقى يوم 3/4/2009 الساعة 11 الصبح فى نفس المكان بتاع كل مره فى المعادى عند محطه الزهراء لمترو الانفاق و من هناك هنتجمع عند مسجد الزهراء و هو قريب اوى من محطة المترو  وده هيكون يوم جمعه محدش عنده حجه اهو 
عندكم الميل للى عاوز يستفسر او اقول لكم عليكم بداليا قوس قزح اسالوها هى بقى وكلوا دماغها


شكرا قوس قزح على المجهود

Saturday, February 14, 2009

صور اسطبل عنتر


الملعب اللى الجمعيه عملته وبتحاول تركب له كشافات علشان تمنع كمان المخدرات من المنطقه الن اسطبل عنتر مفيهاش عسكرى يوحد ربنا
الطياره فوق زى حلمهم
فى الملعب ساعه ما بنطير الطيارات

الاولاد فى المسرحيه وهى عباره عن احلامهم بس

على نفسه يبقى ممثل مشهور والناس تصقف له

الفيديوهات مهمه علشان تشوفوها
بجد اليوم كان يجنن اتبسطت كتير حمدت ربنا وشكرته كتير على النعمه اللى احنا فيها
الاطفال دول محتاجين مساعده مش ماديه محتاجين يقفوا ويلاقوا احلامهم موقع الجمعيه اللى ماسكه اسطبل عنتى اهو يا ريت تشوفوه وتقروا كل حاجه هتنقل لكم واقع

بجد مبسوطه من الناس اللى جت واشتركت معانا واتبسطوا كمان كلهم والحمد لله مطلعناش باصابات رغم لعب الكوره وركوب العجله الاولاد والناس كانوا لطاف وكويسين اوى مش زى ما بنسمع فى العشوائيات
بس فعلا الحياه صعبه هناك
انطح هنا ضياء كتب عن الموضوع بطريقه حلوة اوى لو ربطوا الصور مع الواقع هتفهموا
www.stablantar-dream.com

video video

Wednesday, February 11, 2009

طيارة ورق


كل سنة وانتم طيبين بمناسبة عيد الحب

و يارب دايما تكونوا فى حالة حب للخير زى ما اتعودنا معاكم

عيد الحب السنة دى عايزينه يكون مختلف

عايزين نقول الناس اللى مش بتحتفل به اننا يهمنا نكون معاهم يومها و نقولهم اننا بنحبهم

و ده هنقدر نعمله من خلال جمعية صحبة خير

اللى عاملة يوم لمشاركة الاطفال و الناس فى العشوائيات مشاعر الحب و الاهتمام و نقولهم ان كل اللى بيعملوه اد ايه مهم لهم و لنا و للبلد كلها

و تفاصيل اليوم كالاتى

12:00 - 12:30

تعريف باهداف الجمعية و نشاطها و انجازاتها

12:30 - 01:00

مسرحية الاطفال اللى كنا اعلنا عنها قبل كده و هى من تأليف اطفال اشوارع و تمثيلهم

01:00 - 02:30

مسابقات و ماتش كرة

02:30 - 03:00

استراحة

03:00 - 04:30

طيارات ورق اطفال الشوارع عملوها و هيطيروها فى الجو و دى شعار الحلم لاسطبل عنتر


يومها هتكون نقطة التجمع من الساعة 11 لحد 11:30

فى محطة الزهراء لمترو الانفاق

او عند محطة بنزين التعاون اللى عند كورنيش المعادى

و دى ارقام الناس اللى هتكون فى انتظارنا يومها

مهاب 0128068016

هالة 0106399441

على 0105393135

نفين 0105215288



ياريت نشارك فى اليوم ده بوجودنا معهم و كمان هيكون فى صندوق تبرعات للى يحب يشارك فى مساعدتهم ماديا


وكل عيد حب و انتم بخير
قوس قزح

Wednesday, January 21, 2009

فلسطين .. الجمعة


يوم الجمعة ان شاء الله معادنا للتجمع لزيارة المرضى الفلسطينين فى مستشفى فلسطين
الحالات فى المستشفى كالاتى
الرعاية المركزة حالتين منهم حالة حدث لها بتر للساقين
الدور الاول حالة واحدة مصاب بطلق نارى من دبابة و تم اجراء عملتين له فى الركبة و قاموا بتركيب شريحة و بلاتين و الحالة الحمدلله فى تحسن
الدور التانى يوجد به جناحين
الجناح الاول : يوجد به 11 حالة ما بين استئصال طحال و كلي و حروق و فقد عيون
الجناح الثاني : يوجد به 15 حالة من بينهم سيدة كما يوجد به عائلة عصفور - المصاب بمستشفى الاسماعيلية الذى طلب من المدونة آبى زيارة اهله بمستشفى فلسطين - من ضمنهم طفل صغير عمره 10 سنوات و حالته الصحية حرجة
الدور الثالت يوجد به جناحين
الجناح الاول : يوجد به طفلين
الجناح التانى : يوجد به 14 حالة


الجميع طبعا يشعر باحباط و خذلان عالمي و ان لا احد يعوضهم عن الكارثة الانسانية التي يعيشونها
الرعاية الطبية و التمريض و الاكل مستواهم جيد و الحمدلله
هم لا يريدون اشياء عينية و ان ارادوا فهم لا يمتلكون شنط سفر لوضع اغراضهم بها
فمن يريد التبرع عليه ان يتبرع بشنط سفر الي جانب المال فهو افضل شئ
فكل شخص ادري بما يحتاجه حتي يعود لعائلته به و لكن يجب مراعاة انهم يملكون عزة نفس رهيبة
التجمع يوم الجمعه الجايه دى 23/1/2009 قدام المستشفى الساعه 3 بعد الضهر
المستشفى عنوانها : 64 شارع الثورة فى مصر الجديدة
اللى عاوز يسال فى حاجه يبعت لآبى على الميل
butterfly_549@hotmail.com
الميل ده مش ماسنجر يعنى ايميلات بس اللى ناوى يشترك ياريت يبلغها
قوس قزح