Sunday, December 28, 2008

كتب قديمه

زمان فى المدرسة كان من اهم النشاطات اللى بحبها ان مدرسة الفصل تقول هنعمل مكتبة فى الفصل صغيرة و نشارك فيها بكتب و نتبادل الكتب والقصص مع بعض و كان من حقى استعير الكتاب لمدة اقصها اسبوع و ده كان بيشجعنا اننا كل اسبوع ناخد كتاب جديد


و لانى حاليا معنديش وقت للقراءة بالرغم من وجود كتب جديدة نفسى اقرها ..اكتشفت ان فعلا اكتر وقت كان الواحد بيقرا فيه هو من سن 9 سنين لحد دخول الجامعة


و من هنا جات لى فكرة الخير اللى جاى

ان فى اطفال فى السن ده ممكن لو اتوفر لهم الكتاب يقدروا من خلال القراءة يصقلوا شخصيتهم و يوسعوا خيالهم و ينموا موهبتهم .. لكن مش كل الاطفال بيتوفر لهم الكتاب و ده لان تمن الكتاب لهم ممكن يكون تمن وجبة او تمن دوا




علشان كده .. المرة دى هيكون تجمعنا ثقافى ...ازاى ... يعنى كل واحد عنده كتاب قراه و مركون على الرف او قصة جميلة يحب يوسع بها خيال غيره او حتى مجلات اطفال تضيف بسمة على وشهم .. يحضرهم علشان يشارك بهم معنا فى يوم المكتبة ..


اليوم ده هنروح لمكان فيه اطفال ايتام او مكان بيوفر محو الامية لاطفال الشوارع .. و نعمل رفوف مكتبة و نحط عليها الكتب و المجلات و نكون حريصين ان المكان ده يكون متواجد فيه الشخص المناسب انه يكون امين المكتبة علشان يقدر يحافظ عليها



اختيارى للمكتبة لسببين

الاول حديث الصدقة الجارية ..علم ينتفع به

التانى اننا نشارك فى مساعدة الاطفال على تنمية شخصيتهم و متكونش مساعدتنا لهم بس مادية

يمكن فعلا هم محتاجين المساعدة المادية و العينية علشان يتوفر لهم عيشة ادمية .. لكن فى نفس الوقت هم محتاجين يندمجوا مع المجتمع اللى حواليهم و يتعرفوا على ثقافات تانية و يتعلموا ازاى يشاركوا فيها و ده مش هيحصل غير طريق حاجتين القراءة او الاحتكاك الفعلى من خلال شغل او دراسة .. و اعتقد ان القراءة هتمهد الطريق لبر الاندماج ده





مهمتكم التانية المرة دى غير انكم تشاركوا بحاجة .. هى انكم تساعدونى فى البحث عن المكان المناسب لعمل المكتبة دى

ممكن ملجأ ..او دار تربية ..او فصول محو امية ..

المهم ان يكون الاطفال فيها فى سن القراءة


و ان شاء الله هحاول ان يوم المكتبة دى يكون فى ايام معرض الكتاب ..لسببين الاول ان سهل اى حد رايح المعرض انه يشترى كتاب او قصة باسعار كويسة . و التانى ان الاطفال يحسوا انهم شاركوا فى المعرض بطريقة ما حتى لو كانت الكتب راحت لحد عندهم


فى انتظار ارائكم و اقتراحتكم


ملحوظة : خيخة انا كده حجزت شهر يناير علشان الاتفاق ان كفاية يوم واحد فى الشهر للخير علشان ميكونش صعب على الناس

ملحوظة تانية : اللى مش هيقدر يشارك بكتب او مجلات ممكن يشارك بادوات مدرسية يعنى اقلام او الوان او كراسات


شكرا قوس قزح على المجهود

Monday, November 3, 2008

اتفرج يا سلام

قوس قزح : صباح الخير يا آبى
أبى : صباح النور
قوس قزح : شوفتى الجو بقى برد ازاى
آبى : لا عادى يمكن بس بالليل
قوس قزح : لا لا بقى برد و لازم تطلعى الشتوى بقى
آبى : لا مش دلوقتى لسه بدرى
قوس قزح : خلاص قدامك لحد يوم 28 نوفمبر
آبى : اشمعنى اليوم ده
قوس قزح : علشان ده اليوم اللى هنعمل بؤجة فيه
آبى : لا لو كده يبقى انا هطلع الشتوى حالااا

ايه رايكم تشاركوا معنا تانى فى يوم بؤجة خير ؟
و المرة دى مختلفة لان كل واحد هيكون بالفعل مطلع الهدوم الصيفى و الشتوى فى نفس الوقت و بيبدل دى مكان دى
يعنى لو لاقيت حاجة صيفى طول الصيف مستخدمتهاش يبقى مش هتستخدمها و حطها فى البؤجة
و لو فى حاجة شتوى اى حاجة لبس او بطانية او حتى احذية لاقتيها لاى سبب مش محتاجها حطها فى البؤجة
فى ناس هتقول صيفى ايه اللى فى الشتا .. هقولهم الناس الغلابة ممكن تلبس كذا حاجة فوق بعض و كلنا بنشوف الولاد اللى فى الشارع بيلمعوا العربيات ازاى بيكونوا لابسين حاجة نص كم و تحتها حاجة بكم علشان تدفيهم
و اى حد عنده حاجة غير اللبس مثلا ادوات منزلية او لعب او شنط او حتى سجاجيد ممكن يشارك بها

و اللى هيقول لا معنديش حاجة تنفع للبؤجة و كل الحاجات بستخدمها هقوله اشترى بطانية حتى لو بتاعت طفل صغير و هاتها يدفى بها طفل من برد الشتا و تدفيك انت يوم الدين

ده غير كمان يومها الاطفال هناك هيعرضوا لنا مسرحية من تمثليهم و تاليفهم
و اتفرج يا سلام على الاطفال اللى مكنوش بيلعبوا الا بالزبالة و هم بيحاولوا يقدموا فن لنا
وعلشان كده وجودنا مهم جدا لهم علشان يعرفوا ان تعبهم فى التحضير للمسرحية الناس فعلا قدرته و جات تشوفهم
و تذاكر المسرحية بمبلغ رمزى و هو 5 جنيه و ده بس علشان يحسوا اننا جينا و كمان دفعنا علشان نتفرج على شغلهم
و العائد المادى من التذاكر هيستفيد به الاولاد فى حاجة تانية

يعنى اللى مش هيقدر يشارك فى البؤجة ممكن يحضر المسرحية
المسرحية مدتها حوالى نص ساعة
وهيكون ميعاد عرضها من الساعة 2:30 ظهرا


هنروح ان شاء الله نفس المكان اللى روحناه قبل كده
جامع الزهراء اللى فيه جمعية صحبة خير وصف المكان بالتفاصيل هنا
و هيكون تجمعنا هناك من 11 الصبح
اللى يحب يجى و يصلى فى الجامع هناك صلاة الجمعة اهلا به
و اللى يحب يجى بعد الصلاة هنكون فى انتظاره
بس يفضل يكون الناس كلها حاضرة على الساعة 2 الضهر

و اخر حاجة فرحت جدا لما عرفتها
ان الجمعية قالت ان البؤجة اللى عملنها كانت احسن ملابس وصلت لهم من سنين
ياريت تانى نحاول نكون ايجابيين و كمان بمستوى كويس
و متنسوش تبلغوا كل اللى تعرفهم فالدال على الخير كفاعله

و احب افكركم


بيوم 7- 11 و ده يوم التبرع بالدم بدعوة من مدونة خيخة

و يوم 14 - 11 و ده يوم لعمل خيرى بدعوة من مدونى بورسعيد و التفاصيل هتكون هنا او على الفيس بوك هنا



و اخيرا

اتمنى يا بابا ابو خالد تقدر تيجى و تشارك معنا كعادتك فى عدم التأخر فى فعل الخير .. يارب تيجى

Friday, September 5, 2008

ابو الريش يارب يعيشوا



تحديث:- لسه الحمله ماشيه اللى عاوز يبعت حاجات اوك احنا هنروح الخميس لان فيه ناس ربنا يكرمكهم بعتوا لنا من بره مصر ومن داخلها ربنا يكرمكوا جميعا بشكر كل الناس اللى بتبعت من التدوين ومن خارجه



اسماء الدوا اللى هيحتاجوه



Zovirax 400 gm or 250 or 500--------------هما عاوزين الحقن

L .carintin cap------------------22 L.E
vental inhcler------------------8.5 L.E
Sodium bicarbonate------------- 4 L.E
Rimactan syrup ---------------------6.5 L.E
inderal amp ----------------------- 38 L.E
Nor adrenaline ------------------ 60 L.E ( علبة بها 100 أمبول)
diflucan vial --------------------- 67.5 L.E

meronem 1/2gm or 1gm 80l.e 116L.E
اللي يقدر يوفر الدواء حتى بعد الميعاد اللى هو السبت يبعت ليه وانا هقابله اخده منه من اى مكان ونوديه علشان الوقت عارفه انه ضيق وفيه ناس فى محافظات عاوزين يشاركوا
ابعتوا على الميل ده butterfly_549@hotmail.com
دة بتاع ابى
او بتاع
قوس قزح
kouskoza7@hotmail.com


كلنا لما بنشوف طفل بيبكى بنضايق و بيصعب علينا
و لما يكون بيبكى من الالم او من المرضى بنكون مش عارفين نخفف عنه ازاى و بنحاول نساعده بأى طريقة
لكن تخيل لو فى طفل مريض بمرض جامد و كمان معندوش امل فى الشفاء لانه ببساطة فقير و معندوش اللى يساعده و مع كده مش بيبكى لانه اتعود على الغلب من صغره و الرضا بقضاء الله ،بس انت تقدر ترسم على وشه بسمة .. هتتتأخر ولا هتمد له ايدك ؟؟





الاطفال فى مستشفى ابو الريش بتترواح اعمارهم من حديثى الولادة لحد سن 12 سنة و حالاتهم المرضية مختلفة من فشل كلوى لمرضى القلب لمرضى الصدر و غيرهم
و المستشفى دى من اكثر المستشفيات فى مصر اللى بتستقبل حالات من مرضى الاطفال للعلاج مجانا و فى نفس الوقت هى اكتر مستشفى مش بيوصل لها مساعدات و ده نتيجة انها مش وخدة حقها من الاعلام
و علشان كده وقع اختيارنا عليها بعد ما كنا قلنا ان الخير القادم للاطفال مرضى السرطان لكن فضلنا ان مساعدتنا تكون للاكثر احتياجا بسؤال ناس كتير من دكاترة و اخصائيين اجتماعيين








فبناشد كل القلوب الرحيمة انها تشارك معنا فى رسم بسمة على شفاه الاطفال المرضى
و ده هيكون يوم السبت 13 سبتمبر الساعة 3 نتقابل قدام المستشفى و هى قريبة من القصر العينى الفرنساوى





و المشاركة هتكون هدية منك للطفل بمناسبة رمضان و العيد زى لبس العيد او لعبة او عيديته او حتى لو مش قادر ممكن تشترى شوية حلويات لهم و انت قدرتك بس حدد لنا هديتك هتكون ايه و ابعت لنا ايميل بها و كمان لازم تكون جاد لان حرام نعشم طفل برىء بهدية و فى الاخر متوصلش له
و صعب اننا من دلوقتى نحدد اعمار الاطفال لان بسؤال المستشفى لاقينا ان الاطفال ممكن تدخل و تخرج من المستشفى فى خلال يومين تلاتة




علشان كده يوم الخميس هنعمل زيارة للمستشفى و نحدد الحالات اللى اكثر مرضا او احتياجا و نبلغ كل واحد باسم الولد اللى هتكون هديته موجهة له












فلا تتاخر عن زيارة احباب الله و عن ان تغمرك الرحمة فى هذا الشهر الكريم












و ارجو كل اللى يدخل يساعدنا على نشر الموضوع بانه يضيف البانر ده عنده
و فى انتظار ايميلاتكم على








ملحوظة اخيرة : هيكون فى نفس اليوم الافطار الجماعى للمدونين اللى يحب يشارك معنا اهلا و سهلا به بس بردو يبلغنا على الايميل علشان نعمل حسابه و نبعت له التفاصيل




Friday, August 29, 2008

طبق الخير


كل سنة وانتم طيبين

رمضان على الابواب و كلنا بنستعد له و بنشترى حاجات متعوديين ناكلها فى رمضان زى الياميش و المكسرات و البلح ده غير كمان اننا بنعمل عزومات كتير فى رمضان او حتى بنتعزم عند ناس كتير


و رمضان شهر الخير دايما مهما كانت ظروف الواحد صعب لكن ربنا بيرزقه و بيقدر فعلاً يعمل عزومة او اتنين و ياخد ثواب افطار صائم


تعالوا رمضان ده نعزم حد جديد مع الناس اللى متعودين نعزمها كل سنة


تعالوا نعزم ضيف مش هيقدر يجى يقعد على سفرتك


ضيف انت متعرفوش و مش صاحبك


ضيف هتعزمه على فطارك و هو ممكن يكون سبب لك فى وليمة


ضيف تعالوا نفطر صائم فقير يمكن يكون سبب فى دخولك الجنة


كل اللى عليك تعمله انك تعمل طبق زيادة كل يوم على سفرتك و انت نازل تصلى التروايح اديه لاى حد غلبان


او لو مش قادر على كل يوم خاليها مع كل عزومة اعمل طبق و اعتبره ضيف زيادة جالك

حتى لو انت اللى معزوم اطلب من صاحب العزومة و قلت اعمل طبق للخير و اوعى تتكسف من طلب الخير لغيرك


و فى حل اسهل كمان عليك

خالى الضيف يجى ياخده من بيتك

ازاى ؟؟؟ هو فى فقير هيجى يخبط عليك ؟؟ لا طبعا

كل الحكاية ان فى حاجة اسمها بنك الطعام المصرى

ده مشروع معمول على مستوى الجمهورية كلها بياخد التبرعات من الناس و يشترى بها اكل و يوزعها على الجمعيات المسئولة عن المنطاق الفقيرة و الجمعية هى بدورها نتيجة البحث الميدانى بتاعها بتقدر توصل الاكل لكل محتاج بجد


يعنى انت مليكش حجة ابدا

وممكن تساعد

و لحد البيت يجى المندوب بتاع بنك الطعام ياخد منك تبرعك


اللى ممكن يفيض عن حاجتك ممكن يكون هو ده امنية من امانى غيرك
رقم بنك الطعام المصرى 02-25080000 / 16060
و دوس الشعار تروح للموقع بتاعهم


و كل سنة وانتم طيبين و بخير و قادرين على مساعدة غيركم

Saturday, August 23, 2008

شكر من قلبى


بجد مش عارفه اقول لكم ايه انا من امبارح مش عارفه اكتب البوست ده
بس جمدت قلبى وقولت خلاص
فكرة البؤجه كانت بتاعت قوس قزح واتلكمنا فيها وبدأننا ننفذها بس كنا خايفين مش تنجح انما اللى لقيته من الناس شعنى انى اقول بجد مصر لسه فيها ناس طيبه وحلوة كتير
اولا شكر للاستاذ/احمد كمال صاحب مدونة رحايا العمر لانه ساعدنا اننا نلاقى الجمعيه اللى اتبرعنا ليها وهى صحبه الخير

علشان لما بدات فكرة التبرع من بدايه المدونة انا مكنتش عارفه هودى لمين ومش عاوزة حاجات كبيرة لانها بتبقى معروفه كنت عاوزة فى مناطق شعبيه المهم هو ساعدنا وبقوله ميرسى بجد انا فعلا اتبسطت بيك كتير

تانى حد والاهم ليه كمان الربان لانه اول واحد اشترى حاجه عن طريق بيكيا وبرضه اتبرع بيها

قوس قزح شريكتى الجميله لانها اتبرعت برضه باللى جالها من الحاجات اللى اتباعت

محمد فوزى صاحب مدونه نصحى مع بعض على الرغم من عدم وجوده فى مصر خالص بس شارك معانا بجد يا دكتور انا فخورة بيك اوى

الطائر الحزين انت حد حلو اوى اوى بجد

حنين القلب انتى مش عارفه انا كنت سعيده بيكى برضه قد ايه وعلى الرغم من عدم وجودك بس شاركتى

رودى يا ام نور ربنا يكرمك يا رب وتفرحى بنور اللى مجننانى

احمد يعنى الغردقه الناس المحترمه اللى مش بعدتهم المسافه عن عمل الخير صاحب مدونة دردشه عربى

دول اللى مش كانوا موجودين معانا بس فعلا شاركوا معانا وانا والله مش عارفه اقول لكم انا سعيده ازاى بيكم

نيجى بقى اللى حضروا معانا

من بورسعيد
طبعا بابا ابو خالد انت فعلا ابو المدونين

ايناس نهر الحب واختها الجميله اللى كانت هتقع مننا علشان عاوزة تنام بس برضه تماسكت ههههههههه

جنه بورسعيديه واول مره اعرفها بس بجد ونعم الاخلاق والاحترام والادب وميرسى ليكى انى عرفتك بجد

نيجى لبتوع القاهرة الاذى الكبير اللى جننونى

1- اولا الاستاذ / شريف بجد انا مكنتش متخيلاك كده بس فرحت بمعرفتك
2- فاتيما يا قلب المدونين كلهم يا رب يا طمطم يسعدك ويريح بالك يا رب

3-خالد اس الاحباب معلش يا خالود انت اخويا وانا عارفه انك جدع وبتتحملنى بقى بجد عملت مجهود فى الجون

4- مها زين وبنات حلوان حبيبتى يا بنوته والله انتى وشكرا ليكى انتى وهبه والبنوته التالته نسيت اسمها سورى بجد بجد بس فرحت بيكم يا بنات حلوان

5- سومه المجنونه يا لهوى على اووووعى السريع دى مش مجنونهوبس دى سلحفاه ميرسى ليكى والفول والطعميه وبوسه كبيرة لماما بجد ربنا يخليها لكى

6- الصباغ ابو المخاليل شد حيلك فى البوست ومتنمش علىالسى دى يا ابو المخاليل
7- كريم والله يا كريم انا مش عارفه الهبله اللى تسيبك دى المفروض اخنقها ربنا يكرمك يا رب

8- سووووو اللى هحبسه برضه بجد انت الكلام فيك خلص من بدرى بس برضه مش هبطل انكشك

9- قلب مصرى ابو رقيه بجد اتبسطت كتير ان اول مرة اشوفك انت والمدام فى عمل حلو زى ده ربنا يخلى لك رقيه يا رب

10-ايما ام البنين والزعارير يااااااااا يا ايما متعرفيش انتى حلوة قد ايه وهاديه ورقيقه ربنا يا رب يبارك فيكى على الرغم انى مقعدتش معاكى كتير بس فرحت بوجودك ومشاركتك انت وزوجك والزعرور الصغير ربنا يفرحك بيهم

11-شيماء فضفضه اللى قافله المدونة وهعضها علشان تفتحها شيموو ارجعى بقى علشان انا بحبك اوى

12- ميرررا او وومن اجدع بنت بعقل ميه الف راجل بجد فى الدنيا بجد يا ميرا انتى حلو اوى اوى اوى وانا بحبك علشان انتى عقلك فعلا كبير

13- عسسسقول بجد يا ابو العساقيل يا بختها بيك اللى هتتنيل وتتجوزك ههههههههه ربنا يكرمك يا رب

14- الباحث عن الحقيقه وشريك عسقول فى استراحه الكاشفه بقى يا راجل تيجى ومعرفش اوديك على القسم يالا خيرها فى غيرها هههههههههه بجد اتبسطت انك جيت المشوااااار الكبير ده يجى 3 كيلو كده هههههههههه علشان تشارك

15- خيخه نوران هانم الشاملى والله يا خوخه بجد انتى مش خيخه خالص وانتى اجدع بنت فى الدنيا واللى عملتيه مش يطلع غير من بنت ناس اوى وقلبها كبير ومحترمه ربنا يخلى لكى شريف يا رب يا خوخه

16- احمد سكر ومحمود ابنه السكر الصغير ميرسى ليك يا احمد بجد

بجد يا جماعه انا اتبسطت بيكم كلكم ويا رب دايما نتجمع على خير
وبعد كده كلكم عرفتم مكان الجمعيه اللى يقدر على حاجه يعملها ويوديها
بجد الناس دى بتساعد ناس تستاهل وفى مناطق كتير زى اسطبل عنتر وعزبه خير الله وبتعمل حاجات حلوة كتير وكمان مش بتعلم الناس الشحاته يعنى بتديهم الحاجات دى مقابل حاجه رمزيه عن طريق معرض وبرضه الفلوس اللى بتيجى بتصرفها عليهم يعنى اقصى مبلغ للقطعه 5جنيه وده مش لكل الناس لان فيه ناس بياخدوا بدون مقابل وفيه ناس بتحتاج دواء وقت كتير وفيه ناس هما متكفلينهم
بجد بشكر استاذ احمد كمال اوى اوى
قوس قزح تعبتى اوى انا عارفه
وكل الناس اللى بره مصر وشاركت بقولهم ميرسى ويا ريت نعرف نعمم الفكرة فى كل مكان وكل واحد يجمع فى المكان اللى هو فيه ويساعد الناس


appy

Tuesday, August 5, 2008

بؤجة الخير







كل سنة وانتم طيبين و رمضان كريم






كلنا فى رمضان بندور على اى حاجة تزود حسناتنا و تقربنا من ربنا
و الحسنات مش بس عن طريق العبادات ولا الطاعات لكن كمان عن طريق مساعدة الغير
و بلدنا بتمر بأزمة اقتصادية و الحالات اللى تحت خط الفقر بتزيد و كلنا بنقول ايه الحل


الحل موجود اننا نساعد الناس الغلابة بأى حاجة حتى لو بسيطة
اولا هتاخد ثواب عليها
ثانيا هيكون مشاركتك فى حل الازمة مش بس بالكلام
ثالثا ممكن تساعد انسان انه يفضل شريف او انه يحصل على ابسط حقوقه الادمية بأنه ميدورش على احتياجاته فى زبالة الاخرين










علشان كده فكرنا فى عمل خيرى نعمله سوا فى رمضان



و هو بؤجة الخير




القميص اللى لونه مش عجباك و مش بتلبسه ممكن حد تانى يلبسه فى مقابلة للحصول على وضيفة بسيطة
فستانك اللى موضته انتهت و مركون من سنة فى دولابك ممكن لبنت تانية يكون هو ده لبس العيد
حذاءك اللى بوزه بقى متخربش و مكسوف تلبسه ممكن لحد تانى يكون فرصة انه يلبس حاجة مش مقطعة و تحمى رجله





و حتى شنطة مدرسة ابنك او بنتك القديمة و اولادك مش عايزنها غيرك ممكن يديها لابنه و يفرح بها بدل الكيس القماش اللى بيروح به المدرسة





دور فى دولابك على كل قطعة مرت عليها سنة و مستخدمتهاش
او موضيتها انتهت او مقاسها مش مظبوط عليك او حتى بقت قديمة شوية




بلاش نفكر ان بكرة ممكن استخدمها تانى خالينا نفكر ان النهارده ممكن تكون سترة لحد محتاجها
انت النهارده ضامن انك ممكن تاخد عليها ثواب بكرة انت مش ضامن انك تلحق تعمل بها اى حاجة




لو عايز تاخد ثواب و تشارك بايجابية فى حل مشكلة من مشاكل بلدك
اجمع كل الملابس اللى انت مش محتاجها و كمان ممكن من اخواتك و اسرتك او اصحابك او اى حد تقدر تقوله يشارك
و تعالى شارك بها معنا فى بوءجة الخير
بس متنساش انها رايحة لله و مينفعش ندى لله حاجة مش نضيفة او متبهدلة
كل المطلوب منك تكون الحاجة نضيفة و مطبقة و فى كيس او حتى بؤجة بطريقة منظمة





و اللى مش هيقدر يشارك بملابس مستعملة لاى سبب ممكن يشارك ماديا لشراء ملابس جديدة للاطفال فى العيد





او ممكن يشترى كوبونات عاملها التوحيد و النور للعيد يقدر ياخدها المحتاج و من المحل يختار لبس لاولاده على مقاسهم جديد للعيد


و نتقابل يوم 22 اغسطس الساعة 11 الصبح و نوصلها للناس المحتاجة





و هيكون موجود مندوب الجمعية الخيرية "صحبة خير" اللى هيستلم منا الحاجات




المكان مسجد زهراء مصر القديمة فى الزهراء


خريطة المكان


هنا الطريق من على كورنيش المعادى و المربع الازرق ده البنزين اللى قبل دخلة المعادى و المربع الاحمر هو مكان المسجد و الخط الاخضر بيوضح الطريق




و هنا الخريطة لمحطة مترو الانفاق اللى اسمها الزهراء و لونها بالازرق اما اللون الاحمر فهو لمكان المسجد

و ده سهل اوى للناس اللى هتستخدم المترو


فى حالة ان حد تاه ممكن يتصل على الارقام دى

0124433543
الاستاذة صبرية جمعية صحبة خير

0120667739 - 0106011712
الاستاذ احمد سكر صاحب مدونة احمد سكر

0101345140
الاستاذ خالد صاحب مدونة همس الاحباب
و هنكون هناك لحد وصول اخر حد قال انه ناوى يشارك و يجى اليوم ده
و ده البانر اللى يحب يحطه فى مدونته اعلان للبؤجة و يعمل له لينك على المكان ده
http://bekyaforsale.blogspot.com/2008/08/blog-post.html






Monday, July 7, 2008

شنطة لاب توب





شنطة hp original للاب توب .. مستعمله < تم استعمالها لمدة 6 أشهر >

المميزات:

تستطيع حملها علي الظهر أو علي الكتف ..

الدعامات قوية لحماية جهازك

إمكانية إغلاقها بالقفل ..

الجيوب:

الجيب الأساسي .. للجهاز

الجيب الخلفي .. لأي أوراق أو كتب

الجيب الأمامي و الذي يعتبر بمثابة محفظه مليئة بالكثير من الجيوب

الجيب الأمامي .. للشاحن أو غيره

السعر : هنبدأ المزاد ب 100 جنيه


الشنطه جديده بتباع بحوالى 400 جنيه او اكتر


ملحوظه :

جميع المزادت تنتهى بعد 20 يوم من بدايتها

Wednesday, June 25, 2008

اول مزاااااااااااد لووووووووووولى

مزاد مغلق
فى اول مزاد لنا قدرنا بتشجعكم اننا نعمل الخير
فالربان رسى عليه المزاد الخاص بببلوزة بيضاء بمبلغ 100 للخير و سيتم ايضا التبرع بالبلوزة
و احمد سكر رسى عليه المزاد الخاص بالعربية بالريموت كنترول بمبلغ 100 جنيه و قد نوه ايضا ان العربية ستذهب لطفل يتيم
ارجو من الربان و احمد سكر الاتصال بالايميل المعلن فى المدونة لكى يتم الاتفاق على طريقة التسليم
كما ارجو منهم بعد الاستلام ارسال تعليق - فيد باك - عن مدى مطابقة البضاعة للمواصفاتها المعروضة
حتى نعلم مدى مصداقية البائع
ما تم بيعه




الحمد لله اخيرا استفتحنا يالا بقى خليكوا جدعان عاوزين نعمل منظر واللى هيهظر هعلقه من رجليه على باب المدونة اللى رايح واللى جاى يضرب فيه بالشاكوش اللى يعجبه حاجه من الحاجات دى يقول على الرقم بتاعها فى التعليقات والتمن كمان ولو صاحب الحاجات وافق انا هقول للى عاوز يشترى ويبعت ليه على الميل خليكوا جدعان بقى بدل ما اسيب عليكوا خرفانى الحاجات دى تلبس سن من سنه ونص الى سنتين
الفستان البينك والموف والابيض اللى فيه وردات رقم 6 من
nextمحلات
الحاجات دى مزاد اللى يدخل يقول سعر بس من غير هزار الحاجات حالتها كويسه جدا والعربيه جنبها علبه لبن جهينه علشان تبين حجمها بالطول انها كبيرة

يالا هنبتدى المزاااااد

آبى هانم بتجانى

Monday, June 16, 2008

هتزهقونى من اولها

ايه بقى التهريج اللى فى الهزار اللى هيقلب بنطح ده الا ما حد فتح الباب كلكم دلوقتى بقت معندكوش حاجه كده هتزعلونى عاوزين نشتغل ولا كله فى مارينا ولا ايه ظروفكم لا شدوا حيلكوا يعنى كسروا حاجات دوروا على حاجات اقولكم فكوا كوتشات العربيات وبعوها ههههههههههه واللى عنده سى دى عربيه يقولى واللى يتبرع لبطوط بكاوتش ماشى ههههههههههههههه لا بجد كده هزعل الناس اللى سالتنى ايه الفايده ليه ولا حاجه غير انه عمل جماعى او تطوعى مش اكتر ومش هستفيد فلوس وان شاء الله هنحاول نرتب بين البايع والشارى ويفتح الله الا مين يفتح الله ده ههههههههههههههههه لا بجد ربنا يفتح علينا جميعا ويفتح فى وش اللى يكون عنده ومش عاوز يتبرع سبع حسنات ومشوها حسنات بدل غرز ههههههههههههههههه طيب السيستم بتاعنا 1

- صوروا الحاجه 2

- قولوا السعر 3-

تفاصيل الحاجات 4

- لو لبس جديد او لا 5-

- لو مش عاوز تحط سعر قول اخر حاجه كام او اخر سعر 6

- لو حد عاوز مزاد يقول بكام اخر سعر او نبدأ بكام ويلا بقى الميل عندكم ومش تزهقونى فى عيشتى بدل ما اسيبكم واروح على مارينا فاهمين


butterfly_549@hotmail.com



آبى هانم المضايقه

Sunday, June 8, 2008

اول الكلام



بسم الله الرحمن الرحيم


ازيكم هنا مفيش خرفان بس فيه شاكوش مش على دماغكم لاااااااا خالص بس علشان فرصتى اقعد اخبط على الترابيزة واقول الادوى الا ترى
ايه ده شكلى بقولها غلط ما علينا هتمرن واجيلكم ههههههههههه
اقولكم اللى عنده اى حاجه للبيع كتب مجلات هدوم عفش بيت ايشاربات شنط جزم لبس اى حاجه
جوزة مثلا عاوز يبعه مراته هههههههههههههههه حماته مضايقه مفيش مشاكل كله للبيع
لا بجد اللى عاوز يبيع حاجه يا ريت يصورها ويبعت ليه صورتها على الميل والسعر ومكانه هو فين وممكن المكان يكون سر لغايه لما تيجى تتباع وهنرتب بين البايع والمشترى ازاى يقبلوا بعض كان اخى الطائر الحزين اقترح اننا نتبرع بالحاجات كتبرعات بس انا قولت فيه ناس عاوزة تبيع وتأخد فلوس برضه اللى عنده حاجات عاوز يتبرع بيها لايتام او اى دار مسنين او مستشفى الامراض العقليه لان دول كمان بيحتاجوا لبس وحاجات كتير قوى ممكن يسيب ليه فى التعليقات واللى عاوز يبيع يبعت ليه المواصفات فى التعليق او على الميل ويفضل بصورة وهسيب الايميل بتاعى بس اياكم والمعاكسه بالشاكوش على طول يالا نبدأ الجلسه الميل هسيبه فى الجنب برضه فى السايد بارررررر butterfly_549@hotmail.com
appy