Monday, April 13, 2009

بؤجة جديدة


اولا

ميعادنا اول مايو ان شاء الله للبؤجة

الجمعة 1 مايو



و فكرة البؤجة هى - للى مش شارك قبل كده - انك و انت بتبدل الملابس الشتوى بالملابس الصيفى تشوف ايه اللى انت مش محتاجه منها يكون ضاق عليك او خلاص زهقت منه او موضته خلاص فات اوانها و تجمع الحاجات دى مع اى حاجة تكون مش عايزها فى بيتك ملايات - فوط - احذية - ادوات منزلية - اى حاجة انت مستغنى عنها و نروح كلنا لعشوائيات اسطبل عنتر و نديها للناس هناك فى جمعية صحبة خيرو هم بيخدوها و بيعملوا بها معرض للاسرة الفقيرة و تتباع لهم الحاجات باسعار رمزية و المبلغ اللى يتجمع من المعرض بتستغله الجمعية فى عمل خيرى تانى و ده علشان الناس اللى هتتباع لهم الحاجة تحس انها دفعت فيها و انها مش شحانة و بعد التبرع ان شاء الله هنتجه للازهر بارك و تكون فرصة للترحيب بمهندس مصرى لوصوله لمصر .. بس اللى عنده اقتراح بمكان تانى غير الازهر بارك يقول


تانى حاجة
فى كل لقاء للتبرع بنتجمع بعد اللقاء فى اى مكان علشان نتعرف على بعض اكتر لكن انا لاحظت ان اغلب الحوارات اللى بتكون قايمة فى اللقاء ده حوارت كلها شخصية ..جميل طبعا اننا نحاول نقرب من بعض لكن فى نفس الوقت مفروض مننساش فى اللى كان السبب فى تعارفنا فى الجانب الفكرى .. يعنى ليه بعد التبرع ميكونش لقاءنا زى حفلات السمر و لها جدول كمان يعنى اللى بيحب الشعر يشارك معنا و اللى يحب يناقشنا فى قضية معينة او موقف معين يطرحه و اللى عنده موهبة فنية يعرفنا عليها ..كأننا بالظبط بندخل مدونة و نقول تعليقنا عليها ..كده هندى فرصة للى عنده موهبة ما يعرضها و هيكون اللقاء له هدف اكبر


تالت حاجة

المشاركات فى التجمع لاحظيت انها بتقل ..يمكن هناك اسباب كتير و كل واحد عنده اسبابه .. بس السبب دى اكيد مش دائم ..يعنى السبب اللى مخلاش حد يشارك المرة دى مش شرط انه يكون موجود المرة اللى بعدها .. بس يمكن الناس بتكون مش عارفة امتى التجمع التانى علشان كده فكرنا اننا نخلى التجمع يكون اول جمعة من كل شهر ..هنرتب و نعمل جدول سنوى بالنشاط اللى هيقام فى اليوم ده . علشان كل واحد يكون عارف قبلها بفترة كافة و يختار كمان اليوم المناسب له ..و كمان اللى مش قادر يشارك فى التبرع يقدر يشارك فى التجمع اللى بعد التبرع


رابع حاجة

ياريت اللى عنده افكار لاعمال خيرية او اماكن هو شايف انها تستحق المساعدة او حتى اسر معينة ياريت يقولنا .. وبردو اللى يحب يشارك معنا فى القاعدة اللى بعد التبرع بموهبة عنده او موضوع ياريت يبلغنا و ممكن تكون لقاء مخصوص لعرض افكاره ... بس و النبى بلاش السياسة و الجدال فى الدين


اخيرا
اللى عنده استعداد يعمل تجمع خيرى يقولنا و احنا ان شاء الله هنشارك معاه .. لان الهدف هو نشر الخير فى كل المدونات من كل المدن . .و خير مثلا على ده مدونة نهر الحب اللى نقلت فكرة الخير لمدينتها جزاها الله كل خير

20 comments:

همس الاحباب said...

ان شاء الله
نتجمع على خير
وكويس ان الاعلان عن اليوم جه بدرى
علشان اكبر عدد ممكن يشارك
وخصوصا انه اجازة للجميع قطاع خاص وعام
عيد العمال
وكل سنة وانتم طيبين
وجميلة الافكار الموجودة فى البوست
موافق على الاقتراح
جزاكم الله خيرا
تحياتى

Anonymous said...

فكرة جيدة

Hannoda said...

افكاركم في غاية النبل

احساس شديد بالاهمية بحسه لمجرد انتمائي للمدونين لما بقرأ عن نشاطات و أفكار زي ده

وألم كبير بحسه جوايا لما بلاقي الغربة عزلاني عن الخير اللي بيتعمل من ناحية و عن اللقاءات الراقية والمحترمة جدا من ناحية تانية

و بما اني بصراحة شديدة كسلانة جدا و بخاف ادخل في حاجات تقطع كسلي بنشاطات كتير بخاف اني مش قدها

لكن فكرت ,, لييييه مطلعش شبه الناس اللي انتميت ليهم في التدوين و أعمل أي حاجة ليها قيمة ولو لمرة

أنا قلت اعرضها عليكي
أكيد زي ما أنا حاسة بالتقصير و الانعزال عن نشاطاتكم ده بسبب السفر.. أكيد فيه غيري كتير حاسس بكده برضه

ايه رأيك لو نحاول أنا من ناحيتي أشوف مين هنا في قطر عنده استعداد في تجميع شنطة و كل واحد في اللي قدرت أوصلهم يعمل شنطة يتبرع بيها و نشحنها لمصر.. فيه هنا شركات شحن بري تكلفتها مش غالية أبدا .. و يكون فيه حد منكم في مصر مستعد لإستقبال الشحنة

عربيات الشحن بتوصل الشحنة لأي عنوان ممكن نطلبه منهم..

ايه رأيك في ده؟؟

أنا عاوزة أعرف ابدأ ازاي
يمكن مالحقش البؤجة اللي جاية بس على الاقل ناخد القرار و نشوف حانعمل ايه و أبلغ الناس اللي اعرفها و أطلب منهم يبلغوا اللي يعرفوهم و هكذا .. و ياريت لو الفكرة توصل للجالية اللي فالسعودية و الكويت و الامارات و هكذا.. يمكن ساعتها تكون فاتحة خير و نكون اتعلمناها من مجموعة مدونين كل همهم بلدهم

انا مستنية الرد و المشاركة في التفكير لإني مش منظمة جيدة
:)

تحياتي و شكري البااالغ

Appy said...

Hannoda
-=======

حبيبتى ربنا يكرمك يا رب ميرسي اولا على كلامك وانا معنديش مشكله خالص ابعتى فى اي وقت وانا اروح استلمها بنفسي من اي مكان وانا هفكر ازاي تبعتيها واسال من غير تكلفه عليكي وممكن فى اي وقت اودي للجمعيه
هتناقش مع داليا قوس قزح وان شاء الله اشوف لكي طريقه
ربنا يجازيكي خير يا رب

سومه...مجنونه فى بلد عاقل said...

حقول ايه ربنا يجمعنى بيكم بعد 15 /7

على خير ان شاء الله بعد ما نعمل مشروع النيله اللى مش عارفه ملامح ليه
دعواتكم:(

من غير عنـــوان said...

فكرة رائعة

أتمنى تعميمها

على فكره كمان من أهم أعمال الخير وسهلة جدا

محو أميه أي حد جنبك

أمنياتي

أحمد عاطف said...

إذا مات ابن آدم انقطع عمله إلا من ثلاث

صدقة جارية

وعلم ينتفع به

وولد صالح يدعو له

ربنا يجعل دعوتك للخير في ميزان حسناتك

تقبلي مروري

ابو صهيب ( الجمعاوي الاصيل)سابقاً said...

جزاكم الله خير وجعله في ميزان حسناتك

ملكة بحجابى said...

الله
جميلة اوى الفكرة
انا اول مرة اسمع عنها واعرفها من هنا
ربنا يجعله بميزان حسناتك
واللى فى ايده شىء يقدمه مايبخلش بيه

تقبلى مرورى
ملكة بحجايى

مسوق said...

تأثرت كثيرا عندما قرأت تعليقاتكم ودعائكم. ويمكنكم معرفة التفاصيل بزيارتكم لمدونة على وسديم على www.eldemellawy.co.cc
وأنا مستمر فى الحملة بأذن الله حتى أصل الى أولادى. وأطلب منكم دعم أولادى بمتابعة أخبارهم. فمتابعتكم نصر لهم ولحقهم فى ابيهم. لاحرمكم الله أبدا من أولادكم وبارك لكم فيهم. أحمد الدملاوى

Anonymous said...

http://rebellious-girl88.blogspot.com/

Rooma Qandil said...

ما شاء الله
انا اول مرة ادخل البلوجة دي بعد لف ودوران في البلوجات الاخرى
عاجبني البوست اووي بكل فكرة فيه للخير بجد
الله يكرمكوا ويزيدكم من فضله ويتقبل منكوا صالح الاعمال والنوايا
ان شاء الله هكون على متابعة
ربنا يتقبل منا اجمعين

Sonnet said...

تحياتى لك
و لعمل الخير
و ادعوك
إلى الرابط
لعله يعجبك

http://shayunbiqalbi.blogspot.com/2009/06/blog-post_07.html

م/ محمد صالح said...

ياه اول مدونه الاقى فيها حد له فكر واضح ربنا يوفقك

شجرة الدر said...

ياريت نتواصل
وبتوفيق

الحــ ــزين said...

الحــ ــزين

حبيت أتشرف بالدخول بس مدونتك جميلة وعجبتنى مهاجى تانهى انتى كمان لازم تشرفينى

الحــ ــزين

Tadwina said...

مرحبا / بيكيا
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.

قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/1527

يمكنك متابعة باقى مدونات تدوينة دوت كوم على الرابط التالى:
http://www.tadwina.com

لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع ونرجو منك مراسلتنا للأهمية على الايميل
Tadwina@gmail.com
لوضع البانر الخاص بنا على الصفحة الرئيسية لمدونتك حتي يستطيع قراءنا في مصر والوطن العربي من متابعة تدويناتك المستحدثة

و لكم جزيل الشكر،

فريق عمل تدوينة دوت كوم.
http://www.tadwina.com

Sonnet said...

كل رمضان و انت بخير
تحياتى

crazyrama said...

والله فكره جميله جدا
احنا كنا عاملين معرض خيرى فى منطقه اسمها البراجيل .. والحمد لله كان ناجح الى حد ما بالنسبه لانه كان اول مره نعملها
وبنفكر نعمل قافله طبيه فى نفس المكان
اعتقد هو مكان فعلا محتاج
وحاليا بنعمل شنط رمضان
انا هابقى اتابع البلوج لو فى معاد او تجمع هاكون فاضيه فيه اكيد احب ااشارك باذن الله
تسلم ايدك وجزاك الله خير على الموضوع المفيد ده

Pink Dreams said...

جزاكم الله كل خير

ربنا يجعله فى ميزان حسناتكم ويتقبل منكم يا رب

وكل سنه وانتوا طيبين

تحياتى