Wednesday, March 25, 2009

ميعاد المكتبه والكتب

زمان فى المدرسة كان من اهم النشاطات اللى بحبها ان مدرسة الفصل تقول هنعمل مكتبة فى الفصل صغيرة و نشارك فيها بكتب و نتبادل الكتب والقصص مع بعض و كان من حقى استعير الكتاب لمدة اقصها اسبوع و ده كان بيشجعنا اننا كل اسبوع ناخد كتاب جديد


و لانى حاليا معنديش وقت للقراءة بالرغم من وجود كتب جديدة نفسى اقرها ..اكتشفت ان فعلا اكتر وقت كان الواحد بيقرا فيه هو من سن 9 سنين لحد دخول الجامعة


و من هنا جات لى فكرة الخير اللى جاى

ان فى اطفال فى السن ده ممكن لو اتوفر لهم الكتاب يقدروا من خلال القراءة يصقلوا شخصيتهم و يوسعوا خيالهم و ينموا موهبتهم .. لكن مش كل الاطفال بيتوفر لهم الكتاب و ده لان تمن الكتاب لهم ممكن يكون تمن وجبة او تمن دوا




علشان كده .. المرة دى هيكون تجمعنا ثقافى ...ازاى ... يعنى كل واحد عنده كتاب قراه و مركون على الرف او قصة جميلة يحب يوسع بها خيال غيره او حتى مجلات اطفال تضيف بسمة على وشهم .. يحضرهم علشان يشارك بهم معنا فى يوم المكتبة ..


اليوم ده هنروح لمكان فيه اطفال ايتام او مكان بيوفر محو الامية لاطفال الشوارع .. و نعمل رفوف مكتبة و نحط عليها الكتب و المجلات و نكون حريصين ان المكان ده يكون متواجد فيه الشخص المناسب انه يكون امين المكتبة علشان يقدر يحافظ عليها



اختيارى للمكتبة لسببين

الاول حديث الصدقة الجارية ..علم ينتفع به

التانى اننا نشارك فى مساعدة الاطفال على تنمية شخصيتهم و متكونش مساعدتنا لهم بس مادية

يمكن فعلا هم محتاجين المساعدة المادية و العينية علشان يتوفر لهم عيشة ادمية .. لكن فى نفس الوقت هم محتاجين يندمجوا مع المجتمع اللى حواليهم و يتعرفوا على ثقافات تانية و يتعلموا ازاى يشاركوا فيها و ده مش هيحصل غير طريق حاجتين القراءة او الاحتكاك الفعلى من خلال شغل او دراسة .. و اعتقد ان القراءة هتمهد الطريق لبر الاندماج ده









ميعادنا بقى يوم 3/4/2009 الساعة 11 الصبح فى نفس المكان بتاع كل مره فى المعادى عند محطه الزهراء لمترو الانفاق و من هناك هنتجمع عند مسجد الزهراء و هو قريب اوى من محطة المترو  وده هيكون يوم جمعه محدش عنده حجه اهو 
عندكم الميل للى عاوز يستفسر او اقول لكم عليكم بداليا قوس قزح اسالوها هى بقى وكلوا دماغها


شكرا قوس قزح على المجهود

6 comments:

Abdou Basha said...

فكرة حلوة جدا

Appy said...

عبدو باشا
===============
افهم من كده انك هتحول الكتب علينا ولا كلمه وخلاص
منور عبدو باشا

ShOp gUrl said...

اتمنى تبادل الروابط مع مدونتي فاشون فور عرب
المدونة تختص بي كل ما يهم المرأة العربيه في عالم الازياء, الجمال, الماكياج, الاتيكيت و مواضيع ونصائح من اكبر خبراء التجميل و خبراء الموضه
الرابط المدونة: http://fashion4arab.blogspot.com/
برجاء ارسال الرد علي :
جروب فاشون فور عرب على جوجل
http://groups.google.com/group/Fashion4arab?hl=en
البريد الخاص بالمدونة
Fashion4arab@gmail.com

hasona said...

السلام عليكم

فكرة جميلة

فعلا الاهتمام من الصغر ينمي نشأ مثقف ومبدع
شكرا علي الجهد الجميل ده

تحياتي

magi said...

فكره جميله بس ياريت تفاصيل اكتر

قوس قزح said...

magi

كل الحكاية ان احنا هنتجمع يوم الجمعة3 ابريل و نروح جمعية عاملة مدرسة محو امية للاطفال العشوائيات
و كل واحد هياخد معاه اى كتب او مجلات خاص بالاطفال و يتبرع بها هناك للمكتبة
و المعاد هيكون الساعة 11 الصبح و التجمع هيكون فى مكان جنب محطة الزهراء مترو الانفاق
عند مسجد الزهراء اللى جنبه المستوصف

اى اسئلة تانية احنا تحت امرك