Friday, August 29, 2008

طبق الخير


كل سنة وانتم طيبين

رمضان على الابواب و كلنا بنستعد له و بنشترى حاجات متعوديين ناكلها فى رمضان زى الياميش و المكسرات و البلح ده غير كمان اننا بنعمل عزومات كتير فى رمضان او حتى بنتعزم عند ناس كتير


و رمضان شهر الخير دايما مهما كانت ظروف الواحد صعب لكن ربنا بيرزقه و بيقدر فعلاً يعمل عزومة او اتنين و ياخد ثواب افطار صائم


تعالوا رمضان ده نعزم حد جديد مع الناس اللى متعودين نعزمها كل سنة


تعالوا نعزم ضيف مش هيقدر يجى يقعد على سفرتك


ضيف انت متعرفوش و مش صاحبك


ضيف هتعزمه على فطارك و هو ممكن يكون سبب لك فى وليمة


ضيف تعالوا نفطر صائم فقير يمكن يكون سبب فى دخولك الجنة


كل اللى عليك تعمله انك تعمل طبق زيادة كل يوم على سفرتك و انت نازل تصلى التروايح اديه لاى حد غلبان


او لو مش قادر على كل يوم خاليها مع كل عزومة اعمل طبق و اعتبره ضيف زيادة جالك

حتى لو انت اللى معزوم اطلب من صاحب العزومة و قلت اعمل طبق للخير و اوعى تتكسف من طلب الخير لغيرك


و فى حل اسهل كمان عليك

خالى الضيف يجى ياخده من بيتك

ازاى ؟؟؟ هو فى فقير هيجى يخبط عليك ؟؟ لا طبعا

كل الحكاية ان فى حاجة اسمها بنك الطعام المصرى

ده مشروع معمول على مستوى الجمهورية كلها بياخد التبرعات من الناس و يشترى بها اكل و يوزعها على الجمعيات المسئولة عن المنطاق الفقيرة و الجمعية هى بدورها نتيجة البحث الميدانى بتاعها بتقدر توصل الاكل لكل محتاج بجد


يعنى انت مليكش حجة ابدا

وممكن تساعد

و لحد البيت يجى المندوب بتاع بنك الطعام ياخد منك تبرعك


اللى ممكن يفيض عن حاجتك ممكن يكون هو ده امنية من امانى غيرك
رقم بنك الطعام المصرى 02-25080000 / 16060
و دوس الشعار تروح للموقع بتاعهم


و كل سنة وانتم طيبين و بخير و قادرين على مساعدة غيركم

47 comments:

رئيس جمهوريه نفسى said...

ربنا يجعلها فى ميزان حسناتك يارب ان ضاء اللة وعلم وجارى التنفيذ ان شاء اللة

بيكيا للبيع said...

تسلم الدماغ يا ريس مش عارفين من غيرك كنا عملنا ايه بجد يا رب دي تلاقى صدي هى كمان ومحدش يهلل ويقول كلام وبس

الدفاع said...

روعه والله الافكار دى ولفتى نظرنا لحاجات بسيطه وغايبه عننا ربنا يوفقنا يارب

رئيس جمهوريه نفسى said...

مش مشكلة الدماغ ياما ناس بتفكر بس اهم حاجه اللى يتبنى وينفذ التفكير على العموم انا حستاذنكم فى تنوية عن الفكرة والبوست فى المدونة عندى

همس الاحباب said...

الفكرة حلوةجدا
وسهلة التنفيذ
تسلم الافكار
وبنك الطعام سهل الوصول اليه
ولو محتاجين حاجة من هنالك انا ليه صديق بيشتغل هناك اى خدمة يا بشر

عالم ماريونت said...

السلام عليكم
طبعا مشروع بنك الطعام ده مشروع عظيم وانا بصفتي متطوعة في رسالة اعرف كويس شغلهم عشان ليهم تعاون معانا
ربنا يقدنا كلنا لعمل الخير
بجد شئ هادف ان في ناس مهتمة بالعمل العام والتطوع
فرحت جدا لما شفت الموضوع ده
ولو في اي حاجة نقدر نعملها معاكم غير الاكل اكيد انا تحت امركم
تحياتي
رنا

Unknown said...

ربنا يجازيكي بجد

و ربنا يكرمك

ياسمين

شمس النهار said...

انت قلبك جميل قوي ياابي
ربنا معاكي
كل سنه وانت طيبه

maha zein said...

ربنا يعينك فعلا علي فعل الخير
بجد المدونة دي بتثبت ان المدونين ليهم لزمة
مش شرط يتكلموا وبس
بس ناتج المدونة دي اثبت ان في فعل
وفعل حلو وايجابي
ربنا يعينا علي تنفيذ كلامك
واشكرك انك بتنبهينا للخير
وبتوجهي عيونا عليه
تحياتي يا ابي يا جميلة يا امو نغزة عسولة
وتحياتي ليكي يا قوس قزح داليا الطيبة

داليا ..قوس قزح said...

رئيس جمهورية نفسى
انا بشكرا جدا شكرا خاص على مساندتك و احساسك بالمسئولية معنا

داليا ..قوس قزح said...

الدفاع
الحمدلله اننا قدرنا نلفت نظرك لان فعلا هو ده هدفنا
ربنا يبارك فى افعالك ان شاء الله

داليا ..قوس قزح said...

همس الاحباب

بشكرك على عرضك لكن الحمدلله البنك له رقم سهل و بيبعت المندوب لحد البيت ياخد منك التبرع

و شيلينك للتقيل يا ابو همس :)

داليا ..قوس قزح said...

يوميات نائمة فى الارياف

شكرا على عرضك جدا و ممكن فعلا نحتاج رايك فى موضوع يوم الطفل

جزاك الله خيرا

داليا ..قوس قزح said...

عاقلة على ارض الجنون

جزانا و اياكم يا ياسمين :)

داليا ..قوس قزح said...

شمس النهار

اترك لآبى الرد على تعليقك
و كل سنة وانت طيب :)

داليا ..قوس قزح said...

مها زين

نورتى يا قمر
ربنا يخليكى على تشجيعك
و احنا مش هنقدر نعمل حاجة بدون مساعدتكم لنا و وقوفكم جنبا

تحياتى لاجمل دكتورة

butterfly said...
This comment has been removed by the author.
Empress appy said...

شمس النهار
=============
اهلا بيكى ربنا يكرمك يا رب
بس بجد الفكرة بتاعت قوس قزح دى قاعده توقع علينا افكار طول الوقت وبس هههههههه ربنا يكرمها يا رب وانا بس مساعد على ما تفرج
نورتينا وكل سنه وانتى طيبه

Saudi Romantic said...

افكار رائعه جزاك الله خير

عالم ماريونت said...

اية حكاية يوم الطفل ده؟

ahmed_k said...

ربنا يكرمكم على التنويه الجميل ده

وكل عام وأنتم بخير

Anonymous said...

السلام عليكم

ربنا يارب يكرمكم على المشاريع الجامدة دى والاقتراحات الطيبة لاستغلال موسم الخير دمتى لنا بخير ورمضان كريم

وفيه كلمتين صغننين علشانك فى البوست الجديد ياريت تنورينا قريب يلا سلام

انى احبكم فى الله said...

بصراحه المدونه رائعه وتحياتى ليكى على موضوع طبق الخير الجميل

وياريت تزورى مدونتى لرمضان افضل

رمضان كريم

aya said...

ربنا يقدركم على كل خير يارب
ويجازيكم الخير ويجعله فى ميزان حسناتكم

فكرة جميلة

ربنا يقدر الجميع يارب

كل سنة وانتى بخير يارب

الحكمة ضالة المؤمن said...

كل عام وانتم بخير
وهناك ايضا الموائد الرمضانية
عندنا موائد او ما يسمى
مشروع افطار صائم
تكون هناك
جمعيات مسئولة
او افراد يتكلفون ذلك
بوازع خيري
رمضان كريم
و افكار حلوة

(احمد سكر ) said...

طبعا الدعوه مش محتاجه اى كلام

غير ربنا يتقبل منا

وبقترح حاجه تانى بردو

فى شنطه ف اولاد رجب

تمنها 37 جنيه

فيها القليل

اللى ممكن يكون كتير بالنسبه لناس تانيه كتير

و 37 جنيه ااقل من اشتراك شهر ف النت

ربنا يتقبل منا ومنكم

وياريت تعملى تحديث ياداليا بالموضوع دا

تحياتى

احمد

بنت النيل said...

السلام عليكم

كل عام وانتى بالف خير

وربنا يتقبل منك ومنا رمضان

ورمضان كريم

بنت النيل

محمد فاروق الشاذلى said...

كل رمضان وحضرتك بخير
اللهم بلغنا ليلة القدر واجعلنا من عتقاء هذا الشهر

Asmaa mahaba said...

المشكله انه يوصل لصحابه يا ايبى لان اى شىء فى بنوك ومصريه وحكومه انا مبقيتش اثق فيه الافضل كل واحد يعمل بايده

Unknown said...

مرور للتهنئة بقدوم شهر رمضان وتمنياتى بان ننال منه الكثير ...لا تدع الفرصة تفوتك باغتنام هذا الشهر الذى فضله الله على باقى الشهور
ودعواتى لكم جميعا بقبول اعمالكم وعباداتكم وان نكون مع الرسول ان شاء الله ..سعيد بزيارتى ومرورى والى لقاء قريب لك كل التحية والتقدير

elsha3er said...

السلام عليكم اولا اهنيكى علا اسلوبك وجزاكى الله خيرا بس اية رأيك لو نعزم حد تانى ونتخيل ان هو معانا وهو رسول الله وشوفى حتصرفى ازاى وحتعملى اية وحتكلى ازاى وبجد حتلاقى رمضان دة احسن رمضان وجربى

احمد الشاعر

قوس قزح said...

Saudi Romantic
اشكرك على مرورك و دعاءك

قوس قزح said...

يوميات نائمة فى الارياف

يوم الطفل ده هنتجمع و نروح نزور الاطفال مرضى السرطان و بعدها نفطر سوا

ياريت تشرفينا و تشاركى معنا

قوس قزح said...

ahmed_k

و يكرمك و كل سنة و انت طيب و بخير

قوس قزح said...

جمعاوى

و انت طيب و بخير و اكيد آبى زارتك و قريت الكلمتين :)

قوس قزح said...

انى احبكم فى الله

اشكرك على تشجيعك و ان شاء الله هروح لمدونتك حالا :)

قوس قزح said...

aya
جزاك الله خير على تشجيعك

و كل سنة وانتى طيبة و بخير

قوس قزح said...

الحكمة ضالة المؤمن

اكيد فى ابواب خير كتير
و كل واحد يشوف ايه المناسب له و يعمله
المهم اننا نعمل الخير بأى شكل من
اشكاله
و ربنا يوفقنا جميعا للخير

قوس قزح said...

احمد سكر

فكرة جميلة يا احمد و هعمل بها تحديث و جميل ان كل واحد يلاقى حاجة يوقل عليها لان فى ناس بتكون عايزة تعمل الخير بس مش عارفة طريقة له

جزاك الله خير

قوس قزح said...

بنت النيل

كل سنة وانتى بخير و سعادة و الى الله اقرب
تحياتى

قوس قزح said...

قلب مصرى

امين
اللهم تقبل دعاءه له و لنا و للمسلمين جميعا

قوس قزح said...

سومة .. مجنونة فى بلد عاقل

بنك الطعام مش تبع الحكومة
ده مؤسسة خاصة
و هو بياخد التبرعات يوصلها للجمعيات الخيرية و هى توزعها على الناس حسب المسح الميدانى

اتمنى يكون ظنك غلط
و ربنا الاعلم

قوس قزح said...

حسن محمد توفيق

احنا اسعد بزيارتك الكريمة و فى انتظارها مرة اخرى

و كل سنة و انت طيب و بخير

قوس قزح said...

elsha3er
يا الله يا احمد
و هو فى حضرت الرسول الكريم معنا هنقدر نعمل اى شىء غير القيام على خدمته و طاعته ؟؟
تخيل بقى كمان لو الضيف ده الله عز و جل .. ماهو الخير ده لله يعنى بنعمله لربنا و بنقدمه له

جزاك الله خيرا على التذكرة الجميلة دى

walaa tulip rose said...

والله فكرة ممتازة
كلنا بنعزم ونتعزم كتير اوي في رمضان
ودايما نفطر صائم في الطريق مثلا بتمر
لاكن طبق جاهز للخير دي فعلا فكرة جديدة وان شاء الله كلنا نلتزم وننفذها
تحياتي

Mustafa Şenalp said...

çok güzel site. :)

هموم مواطن said...

الله يجزيكى خير ويجعل عمل الخير فى ميزان حسناتك