Saturday, August 23, 2008

شكر من قلبى


بجد مش عارفه اقول لكم ايه انا من امبارح مش عارفه اكتب البوست ده
بس جمدت قلبى وقولت خلاص
فكرة البؤجه كانت بتاعت قوس قزح واتلكمنا فيها وبدأننا ننفذها بس كنا خايفين مش تنجح انما اللى لقيته من الناس شعنى انى اقول بجد مصر لسه فيها ناس طيبه وحلوة كتير
اولا شكر للاستاذ/احمد كمال صاحب مدونة رحايا العمر لانه ساعدنا اننا نلاقى الجمعيه اللى اتبرعنا ليها وهى صحبه الخير

علشان لما بدات فكرة التبرع من بدايه المدونة انا مكنتش عارفه هودى لمين ومش عاوزة حاجات كبيرة لانها بتبقى معروفه كنت عاوزة فى مناطق شعبيه المهم هو ساعدنا وبقوله ميرسى بجد انا فعلا اتبسطت بيك كتير

تانى حد والاهم ليه كمان الربان لانه اول واحد اشترى حاجه عن طريق بيكيا وبرضه اتبرع بيها

قوس قزح شريكتى الجميله لانها اتبرعت برضه باللى جالها من الحاجات اللى اتباعت

محمد فوزى صاحب مدونه نصحى مع بعض على الرغم من عدم وجوده فى مصر خالص بس شارك معانا بجد يا دكتور انا فخورة بيك اوى

الطائر الحزين انت حد حلو اوى اوى بجد

حنين القلب انتى مش عارفه انا كنت سعيده بيكى برضه قد ايه وعلى الرغم من عدم وجودك بس شاركتى

رودى يا ام نور ربنا يكرمك يا رب وتفرحى بنور اللى مجننانى

احمد يعنى الغردقه الناس المحترمه اللى مش بعدتهم المسافه عن عمل الخير صاحب مدونة دردشه عربى

دول اللى مش كانوا موجودين معانا بس فعلا شاركوا معانا وانا والله مش عارفه اقول لكم انا سعيده ازاى بيكم

نيجى بقى اللى حضروا معانا

من بورسعيد
طبعا بابا ابو خالد انت فعلا ابو المدونين

ايناس نهر الحب واختها الجميله اللى كانت هتقع مننا علشان عاوزة تنام بس برضه تماسكت ههههههههه

جنه بورسعيديه واول مره اعرفها بس بجد ونعم الاخلاق والاحترام والادب وميرسى ليكى انى عرفتك بجد

نيجى لبتوع القاهرة الاذى الكبير اللى جننونى

1- اولا الاستاذ / شريف بجد انا مكنتش متخيلاك كده بس فرحت بمعرفتك
2- فاتيما يا قلب المدونين كلهم يا رب يا طمطم يسعدك ويريح بالك يا رب

3-خالد اس الاحباب معلش يا خالود انت اخويا وانا عارفه انك جدع وبتتحملنى بقى بجد عملت مجهود فى الجون

4- مها زين وبنات حلوان حبيبتى يا بنوته والله انتى وشكرا ليكى انتى وهبه والبنوته التالته نسيت اسمها سورى بجد بجد بس فرحت بيكم يا بنات حلوان

5- سومه المجنونه يا لهوى على اووووعى السريع دى مش مجنونهوبس دى سلحفاه ميرسى ليكى والفول والطعميه وبوسه كبيرة لماما بجد ربنا يخليها لكى

6- الصباغ ابو المخاليل شد حيلك فى البوست ومتنمش علىالسى دى يا ابو المخاليل
7- كريم والله يا كريم انا مش عارفه الهبله اللى تسيبك دى المفروض اخنقها ربنا يكرمك يا رب

8- سووووو اللى هحبسه برضه بجد انت الكلام فيك خلص من بدرى بس برضه مش هبطل انكشك

9- قلب مصرى ابو رقيه بجد اتبسطت كتير ان اول مرة اشوفك انت والمدام فى عمل حلو زى ده ربنا يخلى لك رقيه يا رب

10-ايما ام البنين والزعارير يااااااااا يا ايما متعرفيش انتى حلوة قد ايه وهاديه ورقيقه ربنا يا رب يبارك فيكى على الرغم انى مقعدتش معاكى كتير بس فرحت بوجودك ومشاركتك انت وزوجك والزعرور الصغير ربنا يفرحك بيهم

11-شيماء فضفضه اللى قافله المدونة وهعضها علشان تفتحها شيموو ارجعى بقى علشان انا بحبك اوى

12- ميرررا او وومن اجدع بنت بعقل ميه الف راجل بجد فى الدنيا بجد يا ميرا انتى حلو اوى اوى اوى وانا بحبك علشان انتى عقلك فعلا كبير

13- عسسسقول بجد يا ابو العساقيل يا بختها بيك اللى هتتنيل وتتجوزك ههههههههه ربنا يكرمك يا رب

14- الباحث عن الحقيقه وشريك عسقول فى استراحه الكاشفه بقى يا راجل تيجى ومعرفش اوديك على القسم يالا خيرها فى غيرها هههههههههه بجد اتبسطت انك جيت المشوااااار الكبير ده يجى 3 كيلو كده هههههههههه علشان تشارك

15- خيخه نوران هانم الشاملى والله يا خوخه بجد انتى مش خيخه خالص وانتى اجدع بنت فى الدنيا واللى عملتيه مش يطلع غير من بنت ناس اوى وقلبها كبير ومحترمه ربنا يخلى لكى شريف يا رب يا خوخه

16- احمد سكر ومحمود ابنه السكر الصغير ميرسى ليك يا احمد بجد

بجد يا جماعه انا اتبسطت بيكم كلكم ويا رب دايما نتجمع على خير
وبعد كده كلكم عرفتم مكان الجمعيه اللى يقدر على حاجه يعملها ويوديها
بجد الناس دى بتساعد ناس تستاهل وفى مناطق كتير زى اسطبل عنتر وعزبه خير الله وبتعمل حاجات حلوة كتير وكمان مش بتعلم الناس الشحاته يعنى بتديهم الحاجات دى مقابل حاجه رمزيه عن طريق معرض وبرضه الفلوس اللى بتيجى بتصرفها عليهم يعنى اقصى مبلغ للقطعه 5جنيه وده مش لكل الناس لان فيه ناس بياخدوا بدون مقابل وفيه ناس بتحتاج دواء وقت كتير وفيه ناس هما متكفلينهم
بجد بشكر استاذ احمد كمال اوى اوى
قوس قزح تعبتى اوى انا عارفه
وكل الناس اللى بره مصر وشاركت بقولهم ميرسى ويا ريت نعرف نعمم الفكرة فى كل مكان وكل واحد يجمع فى المكان اللى هو فيه ويساعد الناس


appy

23 comments:

همس الاحباب said...

هههههههههههههه
اول تعليق
لا شكر على واجب يا بطوط هانم
مصر لسه بخير
وهتفضل بخير طالما فيها ناس زى اللى كانت موجودة امبارح
ربنا يجعله فى ميزان حسناتهم يارب
ومجتمعين على خير دايما

قوس قزح said...

ربنا يكرمك يارب
ايوه كده حلو الوصف التفصيلى ده
و بشكرك يا ابى انه برغم مشاغلك الكتير و وقتك الضيق لكن متاخرتيش ابدا عن المشاركة انتى و بطوط

انا سعيدة بمعرفتك و مشاركتى معاكى فى بيكيا

سمر الشافعى said...

ربنا معاكو يارحاب بجد كنت اتمنى انى اشارك بس المشكله انى بعيد ومش بنزل القاهره

(احمد سكر ) said...

الحمد لله

ان فى مشاركه ايجابيه

ونتمنى لقائتنا كلها تكون ايجابيه

وفى الخير وللخير

تحياتى

احمد

حنين القلب said...

حبيبتى رحاب
ربنا يجعل اليوم ده فى ميزان حسناتكم
وبجد كان نفسى اكون معاكم
ربنا يكرمكم
آبى بجد كنت مبسوطه اوى لما كلمتك حسيت انى معاكم
ان شاء الله هحاول اجى يوم مستشفى السرطان
سلام يا اجدع آبى

Asmaa mahaba said...

بس يا به يعنى كلتى الزفر يا خى دا فول وطعمبه المره الجايه محشى او مفتول زى ما تقولى ان شاء الله
انا بقى اللى تعبتك معايا وجيتى وشيلتى الشنطه يا بطه ههههه وضيعنا النضاره ولعبتى لعبه مش كويسه مع ميرا بلاش اسيحلك ههههههههه
ماشى يا حته ايبايه بتسيحى وتقولى سلحفه
مردودالك يا سكرمتخلينيش ابدا معاكى شغل الحماوات
ابلتك سومه_87

Ahmed Kamal said...

آبي الشكر لك و لداليا ، أنا لسه معلق عندها برضه ، و أكرر كلام خالد مصر حاتفضل بخير طول ما ناسها كده من غير زهق و لا يأس و إحباط .

ربنا يتقبل من الجميع ، و يجعل مجهود الكل خالص لوجهه الكريم .

تحياتي لك

محمد said...

اللهم
أجعلهم ممن أحببتهم

أجعلهم ممن يتمعوا بنورك فى الجنات العلى


المسلم من أقتدى بالرسول وفعل منهجه
ولا أزكيكم على الله ولكن أنتم أقتديتم وفعلتم , حتى ولو كانت الصدقات لغير المسلم

سلمتى وسلم كل من كان معكى

الربان said...

تحياتي

بارك الله فيكم جميعا...و أثابكم خير الجزاء أشمله و أعمه ....

اللهم أنر قلوبنا بقبس من نور وجهك
الكريم...و اجعل باطنا كظاهرنا...و تقبل منا ...

كل عام و الجميع بخير.


تحياتي و تقديري

محمد فاروق الشاذلى said...

آبى
نسيتى تشكرى نفسك على الفكرة والمجهود اللى بذلتيه واللى اسمحى لى أشكرك عليه جداً
وأحب أعتذر عن الإزعاج الشديد اللى سببته رقية ليكم كلكم وكان نفسى أقعد معاكم وقت أطول لكن ظروفى منعتنى
إن شاء الله نتقابل تانى فى عمل خير جميل برضو

Unknown said...

ربنا يبارك فيكم
ويجازيكم خير على اللي بتعملوه

شفـقــة و إحســــان said...

انتى وحشة اوى اوى اوى كده بردوا ما تحضريش حفل توقيع الكتاب واللهى كان نفسى اشوفك موت
معلش حظنا وحش بس ان شاء الله نتقابل قريب
شفقة

Anonymous said...

السلام عليكم

وربنا يكرمك ويكرم كل اللى حضروا

وانا والله كان بودي آجي بس والله ظروف كتير حالت دون حضورى أهمها إني عرفت متأخر....وكان عندي ارتباطات معرفتش اتخلص منها

المهم مبروك عليكم نجاح الفكرة وربنا يا رب يكرمكم ويجعله في ميزان حسناتكم

وتحياتى لكم
ويلا سلام

elsha3er said...

اولا الحمد لله انى وصلت للتعليقات اصل البوست كن كبير فتعبنى اوى ثانيا المدونة جميلة والبوست شديدوبعدين دة يكتب واسبوعان

احمد الشاعر

محدود الدخل said...

ربنا يبارك فيك يا شباب ويا بنات ويكثر من أمثالكم
وياريت لو تكررو البؤجة مرة تانية
في مكان تاني ومع جمعية تانية
عشان الي ملحقش البؤجة الأولانية يلحق التانية

...

الـسـيـدة نـون said...

متجمعين فى الخير دايما يا أبى

وبجد
انا فرحانة بيكى انتى وداليا
واحمد كمال جدا
ربنا يكتر من امثالكم يارب


تحياتى ليكى
اختك خيخة

محمد فوزي said...

مصر بخير ببناتها وولادها الطيبين المحبين للخير و ربنا يتقبل إن شاء الله

كل الشكر لكم

Empress appy said...

شفقه هانم واحسان
=====================
والله اسفين بجد بس يعنى معلش اليوم اللى قبلها كنا فى بؤجه الخير وعمل كويس وبرضه مشوفناش حضرتك فمعلش بقى مجتش احتفال عادى علشان كنت بعمل حاجه احسن والنس تعبت شكرا ليكى ومتزعليش
مع انك كنتى متحمسه لفكرتنا
نورتى

ahmed_k said...

ما شاء الله عليكم
دايما متجمعين في الخير
والشكر يقدم أولا ليكي يا آبي ولقوس قزح علي الفكره الرائعه
ولكل من تعب وساهم لإنجاح هذا اليوم
وأعذروني لولا المسافه لما تركت مناسبه إلا وشاركتكم فيها من بداية طرح فكرتها
حتي إتمامها
وأرجو الله ان يجعل ما تقومون به
وزنا ثقيلا في ميزان حسناتكم

وتقبلي خالص التحيه والتقدير

في أمان الله

Mustafa Şenalp said...

çok güzel site. :)

شهريار العشق said...

آبى الجميلة

تزدادين جمالا كل يوم بما تفعلين

أنتى والاخرون من الاصدقالء المدونين

بؤجة الخير كانت رائعة ادام الله مثل هذه الاعمال خاصة فى رمضان

المهم

كنت أتمنى أن اكون حاضرا لكى أشارك ولو بحضورى

ولكن ما باليد حيلة

على أى حال

لغتك كالعادة تتعبنى فى االقراءة ولكن هذه منك أنت يا عزيزتى

على أية حال

أراك قريبا

وأتحدى أن تعرفيننى

شفـقــة و إحســــان said...

افتقدناكى فى حفل التوقيع

ميرا ( وومن ) said...

أبي

يارب دايما متجمعين في الخير اليوم كان جميل جداً

والأجمل اننا بنحاول نستفيد من تجمعنا علي النت

يارب في ميزات حسنات كل اللي حضروا وانشاء الله التجمع الجاي يبقي احسن واحسن

كل سنة وانتي طيبة ياقمر