Tuesday, August 5, 2008

بؤجة الخير







كل سنة وانتم طيبين و رمضان كريم






كلنا فى رمضان بندور على اى حاجة تزود حسناتنا و تقربنا من ربنا
و الحسنات مش بس عن طريق العبادات ولا الطاعات لكن كمان عن طريق مساعدة الغير
و بلدنا بتمر بأزمة اقتصادية و الحالات اللى تحت خط الفقر بتزيد و كلنا بنقول ايه الحل


الحل موجود اننا نساعد الناس الغلابة بأى حاجة حتى لو بسيطة
اولا هتاخد ثواب عليها
ثانيا هيكون مشاركتك فى حل الازمة مش بس بالكلام
ثالثا ممكن تساعد انسان انه يفضل شريف او انه يحصل على ابسط حقوقه الادمية بأنه ميدورش على احتياجاته فى زبالة الاخرين










علشان كده فكرنا فى عمل خيرى نعمله سوا فى رمضان



و هو بؤجة الخير




القميص اللى لونه مش عجباك و مش بتلبسه ممكن حد تانى يلبسه فى مقابلة للحصول على وضيفة بسيطة
فستانك اللى موضته انتهت و مركون من سنة فى دولابك ممكن لبنت تانية يكون هو ده لبس العيد
حذاءك اللى بوزه بقى متخربش و مكسوف تلبسه ممكن لحد تانى يكون فرصة انه يلبس حاجة مش مقطعة و تحمى رجله





و حتى شنطة مدرسة ابنك او بنتك القديمة و اولادك مش عايزنها غيرك ممكن يديها لابنه و يفرح بها بدل الكيس القماش اللى بيروح به المدرسة





دور فى دولابك على كل قطعة مرت عليها سنة و مستخدمتهاش
او موضيتها انتهت او مقاسها مش مظبوط عليك او حتى بقت قديمة شوية




بلاش نفكر ان بكرة ممكن استخدمها تانى خالينا نفكر ان النهارده ممكن تكون سترة لحد محتاجها
انت النهارده ضامن انك ممكن تاخد عليها ثواب بكرة انت مش ضامن انك تلحق تعمل بها اى حاجة




لو عايز تاخد ثواب و تشارك بايجابية فى حل مشكلة من مشاكل بلدك
اجمع كل الملابس اللى انت مش محتاجها و كمان ممكن من اخواتك و اسرتك او اصحابك او اى حد تقدر تقوله يشارك
و تعالى شارك بها معنا فى بوءجة الخير
بس متنساش انها رايحة لله و مينفعش ندى لله حاجة مش نضيفة او متبهدلة
كل المطلوب منك تكون الحاجة نضيفة و مطبقة و فى كيس او حتى بؤجة بطريقة منظمة





و اللى مش هيقدر يشارك بملابس مستعملة لاى سبب ممكن يشارك ماديا لشراء ملابس جديدة للاطفال فى العيد





او ممكن يشترى كوبونات عاملها التوحيد و النور للعيد يقدر ياخدها المحتاج و من المحل يختار لبس لاولاده على مقاسهم جديد للعيد


و نتقابل يوم 22 اغسطس الساعة 11 الصبح و نوصلها للناس المحتاجة





و هيكون موجود مندوب الجمعية الخيرية "صحبة خير" اللى هيستلم منا الحاجات




المكان مسجد زهراء مصر القديمة فى الزهراء


خريطة المكان


هنا الطريق من على كورنيش المعادى و المربع الازرق ده البنزين اللى قبل دخلة المعادى و المربع الاحمر هو مكان المسجد و الخط الاخضر بيوضح الطريق




و هنا الخريطة لمحطة مترو الانفاق اللى اسمها الزهراء و لونها بالازرق اما اللون الاحمر فهو لمكان المسجد

و ده سهل اوى للناس اللى هتستخدم المترو


فى حالة ان حد تاه ممكن يتصل على الارقام دى

0124433543
الاستاذة صبرية جمعية صحبة خير

0120667739 - 0106011712
الاستاذ احمد سكر صاحب مدونة احمد سكر

0101345140
الاستاذ خالد صاحب مدونة همس الاحباب
و هنكون هناك لحد وصول اخر حد قال انه ناوى يشارك و يجى اليوم ده
و ده البانر اللى يحب يحطه فى مدونته اعلان للبؤجة و يعمل له لينك على المكان ده
http://bekyaforsale.blogspot.com/2008/08/blog-post.html






74 comments:

Diyaa' said...

i say 100%
i'm in :)

Mafrousa said...

جازاكم الله كل الخير
فعلا ديه حاجه جميله ان الناس تفكر فى بعضها
و خصوصا ان الناس بتشتري بالهبل و بعد ما تشتري بتزهق من الهدوم او بتتخن عليها
و بتبقى مركونه فى الدواليب مستنيه الفرج
ربنا يكرمكم يارب على الموضوع ده
تحياتي
و رمضان كريم

Empress appy said...

قوس قزح


بجد بشكرك على مجهودك وانا طبعا معاكي
ويا جماعه دي فكرت قوس قزح الشريك الرسمي هنا

Anonymous said...

فكرة جبارة وأنا معاكم بإذن الله
وحأكون خلصت إمتحانات لما ييجي الميعاد المحدد

رئيس جمهوريه نفسى said...

جزاكم اللة خير وجعلها فى ميزان حسناتكم باذن اللة

فاتيما said...

الله ينور عليكم
دوللى دى ماغها تتقال بالدهب
و إنتى يا آبى اجدع بنت شافتها عينيا
أنا هبتدى من النهاردة
و ربنا يقدرنا جميعاً
و نتقابل يوم 19 كلنا على الخير
تحياتى يا وش الخير

فاتيما said...
This comment has been removed by the author.
فاتيما said...

قمر
و دوللى يا قمرين
بصوا يا بنات
أنا بقترح كل واحدة منكن تكتب زى خيخة ما بتعمل كدا فى مدونتها تنويه على جنب من فوق عشان تفكر الناس طوال المدة الجاية بالموضوع
و ميتنسيش خالص
و قبل المعاد بمدة يتعمل بوست للكل
أنا متحمسة جدا
و مبسوطة قوى يا بنات بيكم
ربنا يتقبل إن شاء الله
تحياتى يا ستات مصر
يللى كل ست فيكم بميت راجل

Empress appy said...

فاتيما

انا هكتب بوست فعلا
وحاضر حلوه فكرة الميعاد بس هكتب بوست دلوقتى عن الفكرة والناس تبدأ تجهز

همس الاحباب said...

بسم الله ما شاء الله
فكرة بجد رائعة
انا فعلا كل يوم اعجابى بيكم يزيد
وانا على نفسى معاكم معنويا وماديا
وجاهز من دلوقتى

محمد فاروق الشاذلى said...

محتاجين تفاصيل المكان والميعاد علشان نبدأ نجهز من دلوقت إن شاء الله
وربنا يكرمكم ودايما كده يكون عندكم أفكار ممتازة زى دى

بنت سيناء.. said...

طيب انا فى سيناء ومالى احتكاك بالناس هنا..عندى ملابس كثيرة..كيف اوصلها للمساكين؟؟

يوميات فنانه مفروسه جداا said...

ربنا يبارك فيكم يا رب ويقدركو ويقدرنا علي فعل الخير كلنا ان شاء الله
سلام

maha zein said...

انا مبسوطة اوي من الفكرة الحلوة دي
انا مستعدة اشارك معاكم
من الان
اي جديد عرفينا بيه
ومعاكم معكم
ربنا يجازيكم خير
نفسي اخد معاكم ثواب
بلغينا باى جديد

Anonymous said...

جزاكم الله خيرا وجعله الله فى ميزان حسناتكم

قولوا آمين

Mony said...

معاكم ا ن شاء الله


بس ماتنسوش تقولو المكان و المعاد بالضبط

قوس قزح said...

ضياء
انا سعيدة انك اول شخص يشارك معنا

جزاك الله خير

قوس قزح said...

واحدة مفروسة

ده فى ناس يا مفروسة بتشترى فستان لمناسبة واحدة و ناس تانية بتشترى فستان للسنة كلها
يارب نقدر فعلا نعمل حاجة للناس دول

قوس قزح said...

appy

انا سعيدة انى مشاركة معاكى فى المدونة دى و مدونة الضاحكون
لان بجد انتى انسانة جميلة و عندك حماس يخلى اللى معاكى يتحمس هو كمان

قوس قزح said...

DoctorAllam
انا سعيدة بانضمامك معنا
و ياريت تزورنا تانى علشان تتاكد من الميعاد و المكان
لان مفيش لينك لك

قوس قزح said...

رئيس جمهورية نفسى

جزاك الله كل خير و شكرا على انضمامك لنا

قوس قزح said...

فاتيما

انتى اصلا يا فاتيما معنا
مينفعش نعمل ده من غيرك يا جميل :)
اومال مين اللى هيكتب البوست القوى اللى قبل اللقاء و بعده غيرك ؟

ان شاء الله نظبط المكان و المعاد و نبلغك

قوس قزح said...

همس الاحباب

دايما سباق يا خالد فى عمل الخير

جزاك الله خيرا

قوس قزح said...

قلب مصرى
فى اقرب فرصة هنقولكم التفاصيل بس منتظرين نحدد المكان

و انت يا سيدى ابدا من دلوقتى و جمع الحاجة :)

قوس قزح said...

بنت سيناء
اممممم

طيب ادينى وقت افكر فى طريقة و ابلغك بها

اشكرك على اهتمامك

قوس قزح said...

يوميات فنانة مفروسة جدا

جزاك الله خير معنا
و يمكن يا ياسمين المرة دى يكون فى اطفال و ترسمى على وشهم بسمة بايدك الرقيقة

قوس قزح said...

مها زين

ان شاء الله يا مها انا هلف على كل المدونات اللى اعرفها و اللى مش اعرفها و اخليكوا كمان تلفوا معايا
اول ما نظبط التفاصيل

قوس قزح said...

mercy devil

امين :)

قوس قزح said...

mony

ان شاء الله هنبلغكم فى مدوناتكم

مصر يا موكوسه .....يا مزارع الكوسه said...

والله ربنا هيكرمكم جااامد على اللى عملتوه ده
لان فى ناس كتير محتاجه ده فعلا
ربنا يكرمك
جزاكى الله كل خير

Ahmed Fahmy said...

جزاكي الله خيرا و جعله في ميزان حسناتك يوم القيامة ان شاء الله و هحاول انشر البوست ده و اعرف كل اصحابي عشان يساعدوا
و يا ريت لو تعرفي عناوين او جمعيات خيرية بتعمل كدة ف اسكندرية تقولي لي
تحياتي

Anonymous said...

ربنا يجعلكم للخير دايما سباقين

آبى من فضلك ضمينى للقافلة وقةلى لى ازاى

Soooo said...

والله فيكم الخير

البت خيخه اصلا كانت نزلت موضوع زمان على اللينك ده
http://nouranelshamly.blogspot.com/2008/03/blog-post_05.html
والناس اتحمست شوية وبعدين هبطت
شوفو خيخه وظبطو مع بعض وانا ان شاء الله هاجبلكم بتاع بؤجتين من عندي

وربنا يجازيكم كل خير يارب





سلاموووووووووز

بث تجريبي said...

السلام عليكم
اولا بارك الله فيكى على الفكرة الجميلة دى
فى ناس كتير بيبقى نفسها تشارك فى الحاجات دى
بس مش بتعرف ازاى تشارك او فين تودى حاجتها او لمين او ممكن تكسل
لكن من جواها عاوزة تشارك وتاخد ثواب
فانا بقترح من خلال مدونتك ان مثلا لو كل بيت او اى حد فى عمارة يظبط مع الجيران
انهم يجمعوا اللى عندهم ويروح مندوب من الجمعية ياخد الحاجات دى لان زى ما قلت فى ناس مش بتعرف توصل للجمعيات دى

ياريت تفكرى فى الفكرة دى انه يكون عن الجمعية مندوبين فى كل مكان يجمعوا الحاجات دى .
انا هبقى اجى ابص على ردك فياريت تردى بسرعة على الفكرة دى عشان احاول انى اظبط مع كام واحد.

سلاموز.

Empress appy said...

Do not Press F1
================
لو انت فى مكان غير القاهرة ممكن تبعت لنا الحاجات فى سوبر جيت اى حاجه وانا استلمها احنا عاوزين نجمع اكبر عدد

Mohamed Gabriel said...

جميل جدا

بث تجريبي said...

السلام عليكم
بصى انا اولا من الصعيد يعنى انتوا اللى المفروض تلموا وتبعتوا للصعيد :ي
بصى انا هنا لما بيكون فى حاجه بنجمعها بنعرف نصرفها بمعنى هنا فى الجمعية الشرعية
اللى بتلم دا طبعا غير الناس اللى نعرفهم .
لكن انا فكرتى بتتكلم عن ان فى ناس بتكسل تروح الجمعيات دى بس بيكون عندها حاجات كتير خالص
فالفكرة تكمن هنا فى ايه
ان يكون فى مندوبين يروحوا ياخدوا من كل منطقة او كل حتة الحاجات المتجمعة دى
عشان نخلى الناس تبطل كسل.
ياريت الفكرة تعجبك ومستنية الرد على الفكرة بردو.
سلاموز

بث تجريبي said...
This comment has been removed by the author.
(احمد سكر ) said...

ماشاء الله

ادى الافكار ولا بلااش

ربنا يارب يجعله فى ميزان حسانتكم

ويتقبل مننا جميعا ان شاء الله

وانا ان شاء الله هطبع البوست دا

واحطه فى صفحة اعلانات الشركه عندنا

وناس كتير ان شاء الله هتساهم

ربنا يوفقكم

وطبعا انا معاكم باى طريقه محتاجنى فيها

تحياتى

احمد سكر

داليا ..قوس قزح said...

مدرسة الفشلة بنات

جزاكى الله كل خير
و ياريت تشاركى معنا

داليا ..قوس قزح said...

شريف

يسعدنا مشاركتك معنا

و ان شاء الله هلف على كل المدونات اسيب فيها التفاصيل

داليا ..قوس قزح said...

سوووو

انا هكلم خيخة و اظبط معها هى كمان ان شاء الله

و منتظرينك معاك 3 بؤجات :)

داليا ..قوس قزح said...

Do not Press F1
كل واحد يبلغ الناس اللى يحب انها تشارك
و لو فعلا قدرت تلم كمية كبيرة و صعب توصلها بنفسك بلغنا و نحاول نشوف لها حل

داليا ..قوس قزح said...

medolegend

شكرا

داليا ..قوس قزح said...

Do not Press F1

و الله الثواب بيكون اكتر لما الواحد بيتعب فى الحاجة
يعنى اللى عنده حاجات و مكسل يوديها يبقى مكسل يعمل خير
و ان شاء الله لو فى امكانية ان حد من الولاد يتبرع يروح ياخد حاجات من بيت حد ساعتها ممكن نعمل كده

داليا ..قوس قزح said...

احمد سكر

ايوه كده عايزين الهمة و النشاط

ربنا يبارك لك

و كفاية بس انك عايز تساعد

جزاك الله كل خير

شــــمـس الديـن said...

ان شاء الله انا معاكم بدون مقاطعة و مجهزة حاجات

بس انت ناوية تصرفي الحاجات دي فين ؟
و هنتقابل فين علشان نعمل المعرض دا ولا هنوديلك الحاجة ازاي ؟؟؟؟

مجداوية said...

السلام عليكم

فكرة رائعة ولى اضافة عليه ولكن أرجو أن تسمحى لى بملحوظة صغيرة ولكن هامة جدا

قال الله تعالى :
لن تنالوا البر حتى تنفقوا مما تحبون

وقال أيضا عز وجل :

يا ايها الذين امنوا انفقوا من طيبات ما كسبتم ومما اخرجنا لكم من الارض ولا تيمموا الخبيث منه تنفقون ولستم باخذيه الا ان تغمضوا فيه واعلموا ان الله غني حميد

المعنى ان البؤجة دى تكون من أحب الأشياء عندنا مش عشان اللون بهت اللى مترضيش تلبسيه متطلعهوش صدقة واللى مترضيش تاكليه وده معنى تغمضوا فيه

أما الأشياء المستهلكة واللى منرضاش نلبسها لها حل تانى وهى اننا نبيعها وبتمنها نشترى بيها حاجات جديدة وكمان تعملى نسبة معينة زى ضريبة المبيعات على كل شىء تبعيه فى المدونة وتكون لصندوق الصدقات و كل ما تجمعى مبلغ كويس يا أما توزعيه يا أما تشترى بيه حاجات جديدة
ده للمدى البعيد يعنى وممكن تعمليها من السنة للسنة يعنى تجمعيها لتخرجيها فى رمضان من كل عام

ربنا يقدرك دايما على فعل الخير

وتكونى دايما وكل من يفعل الخير الذكورين فى القرآن بأن فى أموالهم حق معلوم للسائل والمحروم وهى تشمل الزكاة والصدقات

احنا هنا فى الأسكندرية بنعمل كده كل رمضان مع صديقة ليا من خمسة وعشرين سنة صداقة عمر يعنى بنجمع فلوس ونجيب بيها مواد غذائية ونبعتها للأسر الفقيرة زى بؤجتك كده بس أكل فقط
ابتدينا خمس أسر ودلوقت وصلنا لأكثر من 120 أسرة وبتكون كرتونة فيها ما يكفى عدد خمس أفراد من مواد ممكن تخزن ومواد للطبيخ مثل اللحمة أو الفراخ

وربنا يقدر الجميع على فعل الخير
أدينى قولت اللى عندى فى الموضوع ده ولو عايزة أى حاجة منى أنا تحت أمرك

سلام يا آبى يا جميلة الباطن قبل الظاهر وده الأهم

مجداوية said...

أنا أسفة لأختنا قوس قزح لأنى وجهت الكلام فقط لآبى مأخدتش بالى ان المدونة لكم انتو الاتنين
فهو خطأ غير مقصود

وأعتذر عنه

جزاكما الله كل خير

nosha said...

الأستاذة داليا
أحييكي جداً على فكرتك لفعل الخير والثواب وأنا أتمنى المشاركة معاكم وياريت لو أقدر أساعد بأي حاجة
وبجانب فكرتكم الجميلة فأنا عامل فكرة تانية في جروب موجود على الفيس بوك وأتمنى مشاركتك ومشاركة كل الناس سواء مدونين أو غير مدونين المهم إننا نشارك ونتعاون ونعمل الخير لوجه الله وده اللنك بتاع الجروب

http://www.facebook.com/group.php?gid=19165517503

تحياتي ليكي

فاتيما said...

بيبى و دوللى القمرات
ازيكم
وحشتونى جداً
و عاوزة إتخانق معاكم جداً
و بعدين قولت بلاش
ليه إتخانق ؟؟!!
عشان غيرتم المعاد ليوم 22
و مش هقدر آجى يوميها للأسف
بس ممكن اطلب طلب سخيف شوية ؟؟
أنا إحتمال كبير أروح
سفرية إسكندرية يوم 19 ...
منكن لو ينفع يا آبى
لو إنتى جاية إسكندرية
أجيبلك الحاجة و تشيلها عندك فى بطوط لحد يوم تسليم بؤجة الخير بتاعتك
و تسلمى بتاعتى معاكى ؟؟
لو مش هينفع خلاص
أبقى أروح لوحدى فى يوم تانى
و على مهلى
عموماً أنا خلاص نويت
و النية لله
و إبتديت أطلع حاجات
و فاضل الغسيل و المكواة
و التغليف بقى فى إكياس
بلاستيك كويسة كدا
و ربنا يتقبل منا
إن شاء الله
تحياتى يا حبيبتى
يا قمر التدوين كله

Hoda said...

ربنا يبارك فيكى يا آبى ويجازيكى خير انتى وكل المشاركين . انا ما استبعدشى عن انسانه بأخلاقك وانسانيتك انها تعمل كده واكتر .. بس معلشى بقى انا مرتبطه برضه بكام جمعيه خيريه بساعد فيهم على اد ما بقدر بمجهوداتى المتواضعه فى منطقتنا هنا يعنى وهحاول بأذن الله اشترك معاكم برضه .. لكن قوليلى انتى قافله الكوكب بتاعك ليه مغلق للتحسينات ولا بتنفضيه عشان كل سنه وانتى طيبه بقى رمضان قرب وكده

بث تجريبي said...

لسلام عليكم
ممكن طلب انا عارفة انى مش هقدر اشارك فى الحملة دى لانى برا القاهرة لكنى بطلب منكم ان الحملة دى تستمر بمعدل كل شهر يبقى فى لم تبرعات يتم بحيث يتم تحديد يوم معين كل شهر يسمى يوم الخير
لانى ان شاء الله هكون فى القاهرة اول الدراسة وعاوزة اشارك باى حاجة ان شاء الله.
ياريت تفكروا فى الموضوع دا وجزاكم الله خيرا.

وعاوزين ارقام ثابتة بحيث لو اى حد حب يتبرع فى اى وقت يلاقى حد ممكن يساعده يودى حاجته فين .

وبالنسبة للفكرة اللى عرضتها انا كنت اقصد ان فى ناس بتحب تتبرع لكنها مش عندها القدرة انها تخرج او ممكن تكون عاوزة تروح لكن انتوا عارفين اكيد الشيطان مش بيسيب حد فى حاله خصوصا لو هيعمل خير
دا كان غرضى من طرح الفكرة بتاعتى.

سلاموز

أميرة said...

السلام عليكم ورحمة الله وبركاته

انا مش هضيف كتير بس لما قرأت اسم " صحبة خير " قلت ممكن اشارك ولو بمعلومة بسيطة

صحبة خير كانوا مجموعة شباب اتجمعوا من كذا سنة و ليهم انشطة خيرية كتيرة ( ربنا يعزهم و يزيدهم كمان و كمان )

و اعمالهم الكبيرة ما شاء الله كبيرة و ليها مردود واسع النطاق

و من كام سنة من قريب عملوا جمعية مسجلة و سموها صحبة خير و دا عنوان الجمعية :

مقر جمعية صحبة خير
19شارع النادي الرياضي- خلف برج الأطباء- أول فيصل
للاستعلام تليفون: 35689721
من 9ص إلى 8م ما عدا الجمعة

بيعملوا دورات تدريبية و مساهمات خيرية كتيرة جدا .. اللي بيدور علي باب خير ممكن يتصل بيهم او يزورهم هيلاقي حاجات هو ممكن يكون مفيد فيها و هيستفيد ان شاء الله اكيد :)

الموقع الرسمي بتاعهم اهو :
www.so7betkhair. com.eg
و الايميل هو : so7betkhair@yahoogroups.com

ممكن تتصفحوا الموقع و تعملوا اشتراك في الجروب و هتشوفوا ابواب خير كتيرة هتتفتح امامكم باذن الله :)

________
ملحوظة مهمة : لا ابغي وراء ما كتبت الا اني اشاور علي باب خير و ليس الدعاية لاي جماعه ..بس كل الحكاية اني اعرفهم من سنين بشكل غير مباشر.. و صدق رسول الله صلي الله عليه وسلم : الدال علي الخير كفاعله ..

اللهم اني اعوذ بك ان اشرك بك شيئا وانا اعلمه و استغفرك لما لا اعلم

Empress appy said...

مجداويه

المدونة بتاعتنا كلنا يا حبيه قلبى ربنا يبارك فيك

Empress appy said...

فاتيما


علم وينف> يا عمرى طبعا وفى اى مكان اجيلك

Empress appy said...

نوشه
========
ربنا يكرمك يا نوشه وشكرا على مشاركتك

Empress appy said...

حنين
=======
لا يا حبيبى النت كان تقيل والصفحه عندى تقيله ظبطها خلاص يا حبيبى

وحاولى تشاركى حتى بانتشار الفكره يا ريت يا حنين

Empress appy said...

Do not Press F1
=================
حاضر يا حبيبتى هنفكر ونظبطها واقولك

Empress appy said...

اليس فى بلاد العجائب
=====================
ربنا يجازيكى خير على اللى بتعمليه

شفـقــة و إحســــان said...

جزاكم الله كل خير برافو عليكى يا ابى بجد عمل خيرى ممتاز

امل said...

hالسلام عليكم
ربنا يكرمكم على الفكرة الجميلة دي ويجعلها في موازين حسناتكم دي من أكتر الحاجات اللي بتدخل الجنة "من ستر مسلما في الدنيا ستره الله في الدنيا والآخرة"
تحياتي وتقديري

ملحوظة آبي مدونتك بتفتح عندي من غير ما البوستات تظهر فيها مش عارفه ايه المشكلة

Anonymous said...

fekra momtaza w kont 3ayza asta2zenko lw tet3emel group 3ala el-facebook w a7`od moktatafat mn kalam 7adretko (appy w koos koza7) w akteb eno man2ool 3an modawenatko fa lw 2olto ok hab3atloko el link w in sha2 allah nl7a2 neb3at le nas ysharko bardo...fa eih ra2yoko..? ana hatabe3 rododko 3shan a3raf momken wala la2...w ay contact information about me ana akon sa3eda adehalko...shokrn gedn

ماء تشرين said...

طب انا من اسكندريه اشارك ازاى حتى لو تعرفوا حد هنا هى مشكلبتى فعلا ان نفسي ادى لحد حاجه وانا متأكده انها هتوصل لليستهلها
رجاء تردوا عليه ويارت تقولو تبلغونى برد

نـــــور said...

جزاكى الله كل خير
ياريتنى كنت من سكان القاهرة علشان اقدر اقابلكوا واشارك لكن هحاول هنا فى مكانى
ادعولى بقى وربنا يوفقكوا
تحياتى ليكى وللى هيشاركوكى
دمت بخير

بنت الاسلام said...

ربنا يوفقكم لما فيه الخير

وان شاء الله نقدر نساعد

او ندل عليه

والدال علي الخير كفاعله

تحياتي

بنات صاحبة الجلالة said...

والله مشاء الله فكرة هايلة وجميلة جدا وجزاكم الله كل الخير احنا عرفنا بموضوع بؤجه الخير من اختنا الجميلة نهر الحب وباذن الله هنحاول نجي ان شاء الرحمن في المعاد لو لا قدر الله تااخرنا عن المعاد هنكون علي اتصال باي حد فيكم بحيث نشارك معاكم باذن الله وربنا يوفقك لفعل الخير دايما يارب احنا برضوا طبقا الموضوع دا السنة اللي فاتت قبل رمضان في محافظتنا واكتر حاجة بجد اسعدتنا البسمة والدعوات

بجد فكرة هايلة وربنا يجازيكم كل الخير يارب

دعاء مواجهات said...

انا عاوزة اشارك معاكم

بس صعب جدا انى اكون فى القاهرة يوم الجمعة

ياريت لو ممكن اوصل الحاجات فى اى يوم ف وسط الاسبوع للمتخصص عرفوونى ازااى

بليز رودوا عليا

سلاام وجزاكم الله خيرا..

Empress appy said...

Bo2Loz
=========
شكرا ليك
بس احنا فعلا عاملين جروب اسمه بؤجه الخير على الفيس بوك ممكن تشارك فيه ربنا يكرمك يا رب

Empress appy said...

ماء تشرين
==========
والله كان فيهاجتماع مدونين اسكندريه وكان فيه ناس من القاهرة سورى بقى مخدتش بالى من ردك هحاول اعرف واقولك اتصلى بجمعيه رساله ممكن يدلوكى بجد
ربنا يكرمك وميرسى ليكى

Empress appy said...

بنات صاحبه الجلاله
====================
تنورى القاهرة كلها






دعاء مواجهات
==========
نمرة المشررفه موجوده يا دودو واحنا هنقولك برضه اتصلى على ححد احمد او خالد وانا هكلمك يوم الجمعه

micheal said...

كل سنة وانتي طيبة أولا
ثانيا..أرفع لكي لاقبعة علي هذه الأفكار الخيرية الجميلة البناءة
ثالثا..حاولت ادخل مدونتك غيبي بلانيت وبيظهر لي فراغ بمبي كبير
:)
شوفيلك حل
تحياتي

غروب said...

فعلا والله فكره حلوه اووووووووى ماما بتعمل كده دايما حتى ف الحجات اللى تخصنى

لكن انا عمرى معملتها بايدي بس بصراحه الفكره عجبتنى وكلامك حلو وعشان كده هحاول اعملها بنفسي الحجات الكتيييييييييير اللى بشتريها وف الاخر مش بحب البسها وهى جديده الحمد لله هتنفع ناس كتير وانا هاعمل ده بنفسي ان شاء الله بس للاسف انا لست قاهريه ...ولذلك هقوم بالعمل ده هنا عندى انا واصحابي ونوزعه بطريقه صح ان شاء الله

هانى المصرى said...

ربنا يوفقك لعمل الخير .
وكل سنه وانتى طيبه